WASHINGTON: Entrante awe 3 di November 2026, tur viahero internacional cu kier subi un vuelo rumbo pa cualkier teritorio Mericano,
of hasta si bo kier pasa di transito pa haci conexion na Aeropuertonan di e pais, lo tin di completa obligatoriamente un “Declaracion di Salud” nobo pa cada pasahero. Esey ta loke autoridad Mericano, y tambe Aerolineanan ta informando.
E medida aki a wordo emiti door di Centers for Disease Control (CDC) di Merca, y ta indica cu e tin como meta pa “fortalece e controlnan di vigilancia epidemiologico internacional contra e virus di Ebola.”
Den e sentido ey, ta mustra cu via di e medida aki, cada un pasahero mester certifica “bao fe di huramento”, cu nan no a permanece ni a haci transito via di e Republica Democratico di Congo (Africa) durante e 21 dianan prome cu bo ta viahando pa Merca.
E certificacion yama na ingles como ‘Health Attestation Form’ por wordo completa di antemano via di plataformanan digital, of via di un papel imprimi for di un formato PDF cu tin di wordo verifica door di e Aerolinea prome cu bo subi y drenta e avion.
Si bo kier download e PDF pa print e, y bo yen’e cu pen, bay na e website aki:
www.bit.ly/11ebola
Si bo kier download un PDF unda bo por yene cu bo computer of tablet y despues print e, bay na e website aki:
E rekesito ta obligatorio na tur pasahero, sin excepcion, incluyendo ciudadanonan Mericano, residentenan legal, esnan cu ta uza Visa Waiver Form, y tambe pasaheronan menor di edad, y tambe esnan cu ta bay pasa door di Merca djis di transito rumbo pa otro destino.
Aerolineanan cu ta bula pa Merca, a adverti caba cu si bo no presenta cu e documento aki ora di Check-In, nan lo no lagabo subi e avion. Autoridadnan a bisa cu e formulario aki no ta substitui e exigencianan normal di Inmigracion, manera paspoort vigente, Visa corespondiente, y autorizacion electronico ESTA. Tur esey tambe tin di wordo cumpli cu ne.
E exigencia ta bay na vigor entrante 3 di November 2026 pa 11:59 pm (ora di New York). E potret aki a wordo saca door di fotografo di DIARIO den Aeropuerto di St. Louis na Missouri.
