Droga ta wordo ofreci y presenta den pakinan cu ta mustra inocente y actractivo

Rulienne Arends di FADA:

ORANJESTAD (AAN): E manera cu droga ta wordo presenta y ofreci ta cambia constantemente, hopi biaha den pakinan cu ta mustra inocente y atractivo. Trahado preventivo di FADA, Rulienne Arends, ta enfatisa cu esaki ta haci conscientisacion entre muchanan y hobennan cada biaha mas importante y necesario.

   Segun Arends, e fenomeno aki no ta nobo na Aruba. Den pasado, droga a wordo treci den paki di Cheetos y otro chips, y tambe presenta den forma di gummies, bara di chuculati y otro mangel. El a señala cu e presentacionnan aki por atrae atencion di hende, incluyendo muchanan di edad chikito.

   Arends a menciona cocaina, MDMA (XTC), fentanyl y combinacionnan di droga como sustancianan cu por forma parti di e peliger. Su mensahe ta cu un empake atractivo of un producto cu ta parce mangel no ta un garantia cu su contenido ta sigur.

   Como parti di su trabao preventivo, FADA ta cuminsa cu conscientisacion for di kleuterschool, adaptando e informacion na edad y nivel di comprension di e muchanan. Mediante presentacionnan y videonan, e organizacion ta splica e peligernan di droga, incluyendo esnan presenta den forma di mangel. Tambe ta comparti informacion tocante e tiponan di droga cu Polis ta encontra durante controlnan.

   Sinembargo, Arends a expresa preocupacion cu e informacion cu hobennan ta ricibi no semper ta wordo aplica ora nan wordo confronta cu droga. Esaki por sosode na un fiesta, na scol of den nan propio circulo di conocinan, sea via un amigo of hasta un miembro di famia.

   P’esey, e trabao preventivo mester sigui enfoca riba yuda hobennan reconoce situacionnan di riesgo, y para firme y bisa no na droga. Arends a subraya cu e responsabilidad aki ta comparti. FADA ta cumpli cu su parti, pero guia y envolvimento di mayornan ta esencial.

   Mayornan mester mantene un dialogo constante cu nan yiunan, sa unda nan ta bay y cu ken nan ta pasa tempo, y papia abiertamente tocante e riesgonan cu nan por encontra. Esaki ta inclui e posibilidad di wordo ofreci droga of si un persona altera nan bebida sin nan consentimento. Ademas di splica e peligernan, ta importante pa muchanan sa con pa actua y na ken nan por acudi pa ayudo.

   Cu e temporadanan di fiesta nos dilanti, durante cua hopi mangel ta wordo reparti, Arends ta haci apelacion na mayornan pa mantene atencion y sigui conbersa cu nan yiunan. Wak material informativo hunto por yuda habri e conbersacion tocante e consecuencianan di uzo di droga.

   “FADA ta sigui conscientisa specialmente na scolnan rond Aruba, informando nos muchanan debidamente sperando cu nan tuma bon decision na momento cu nan ta permiti di bay eventonan of ta riba caya”, Rulienne a enfatisa.