E sesionnan di 'Ban Pa Bay' organisa pa Departamento di Enseñansa ta den full swing

Muchanan cu ta bay studia ta haya informacion valioso

ORANJESTAD(AAN): Departamento di Enseñansa a cuminza cu un training yama ‘Ban Pa Bay 2025’, relacion cu e Vierlandenoverleg, for di cual a sali cu Aruba mester enfoca mas riba e exito di e hobennan cu ta bay afo pa studia y ta bay studia na Aruba.

“A base di esey nos a bin cu un programa, despues di e sinta y reuni varios biaha cu tur e islanan di Reino y Hulanda”.

Despues di esey nos a sinta tambe cu decanonan y studiantenan na Corsow y eyden a sali afo cu mester bin un tipo di Caribbean Foundation, pa traha riba e preparacion di e studiantenan cu ta bay afo pa nan ta mihor prepara y tin tur informacion necesario y corecto prome cu nan subi avion of keda studia na Aruba mes, segun Sharine Croes-Dubero, Coordinador Studiefaciliteiten Afdeling di Departamento di Enseñansa.

Den un entrevista cu DIARIO el a sigui bisa cu esaki ta pa yuda e studiantenan haya un mihor chens pa ta exitoso den nan estudio.

Croes-Dubero a splica cu ta bay cuminza un programa y pa esey a acerca Realign Coaching Consultancy and Services, cu sosten di Stimuleringsfonds y SEA (Strategic Educational Alliance – Nederlandse Samenwerkende Hogescholen).

Locual ta bay wordo presenta ta locual e studiante y decanonan na Corsow a pidi pe y pa Aruba lo lanta un red di plataforma di decano.

Shahaira Landa Rodulfo di Realign Coaching a splica cu ya caba siman pasa a cuminza cu e prome session di training cu tabata online.

“Dia 22 di April nos a ranca sali cu sesion number 2, cu ta bay ta te dia 5 di Mei y despues di esey riba 7 di Mei ta bay tin un sesion online”.

Despues cu e periodo di examen pasa nos ta bay tene atrobe un sesion fisico.

Tur sesion e ora ey ta bay ta fisico, esta di 28 di Mei te cu 13 di Juni, segun Landa Rodulfo.

El a sigui bisa cu ta bay tin mas sesion di 17 di Juni te cu 28 di Juni.

Segun Landa Rodulfo, tur studiante cu a aplica pa Aruba Lening a haya un email cu tur informacion y fecha y tin un link unda cu nan por a aplica pa cada sesion cu ta pas mas den nan schedule.

Cada tayer ta consisti di 12 grupo y tin un maximo di 25 studiante pa grupo.