Debi cu clientenan no tin ‘username’ tampoco ‘password’
ORANJESTAD (AAN): E siman aki, Luenne Gomez-Pieters kende ta directora di Departamento di Impuesto (DIMP), a splica cu desde 2019 cu nan a introduci e sistema digital di BO Impuesto (BOi), y cu yegada di Pandemia na 2020, ta mucho mas contribuyente y compania a registra nan mes den e portal digital aki di DIMP. Unabes cu bo ta registra eynan, e contribuyente ta acopla tur su cuentanan di impuesto riba dje pa por tin mucho mas facilidad den maneho di eseynan.
Pero DIMP a bin realiza ultimo temponan, cu tin un grupo di cliente cu ta registra den e sistema digital aki, pero nan no tin ni ‘username’ y tampoco ‘password’ pa por entrega nan formularionan di BBO.
Segun Gomez-Pieters, na DIMP a logra identifica un grupo di 69 contribuyente tabata kier a entrega nan formularionan y a purba drenta den contacto cu nan, pero nan tabatin username ni password pa por registra y drenta den e portal digital.
Debi na esey, a bin ta automatiza diferente di nan procesonan durante añanan pa por ta no djis mas eficiente, pero tambe por brinda e contribuyente e facilidad pa por cumpli cu nan debernan fiscal.
E Directora di DIMP a splica cu e 69 contribuyentenan aki cu consecuentemente no por a entrega nan formularionan, riba computernan di DIMP a keda registra cu nan ta “laat”, y/of cu documentonan “no a wordo entrega”.
Esaki automaticamente a genera riba e 69 contribuyentenan aki un cobranza adicional cu ta ser considera como un boet. E contribuyentenan a reacciona cu no ta nan eror, pasobra nan no tin username ni password, y a trata di comunica via BOi di DIMP, cu ta manda e mensahe via email. Pero nan no a ricibi nunca un reaccion na tempo, y e fecha a pasa.
Awor Luenne Gomez-Pieters ta splica cu nan ta admiti cu e cobranza extra (boet) aki no ta na su lugar, pues di nan banda lo bay coregi esaki tambe den nan sistema. E Directora a splica cu nan lo drenta den contacto cu e 69 contribuyentenn aki cu a haya e boet aki pa informa nan cu tur cos ta wordo coregi door di DIMP.
Pero ta haci un suplica na tur contribuyente pa nan percura pa nan tin semper nan ‘username’ y tambe ‘password’ ora di uza e portal di BOi. Si acaso bo no ta registra corectamente, corda haci esey na tempo debi cu e proceso ta automatiza. Si bo no entrega e formulario, lo bo haya boet, y no tin otro opcion.
