E ruta stima di Carnaval na San Nicolas awor ta den peligro

Trucknan di Musica ni Carosa lo no por pasa mas

• Birada smal dilanti Teleshop Setar lagando pueblo babuca 

ORANJESTAD (AAN): Tur cos ta mustrando, cu aparentemente ora cu arkitectonan di DOW hunto cu esnan cu a traha e plan pa “Revitalizacion di Centro di San Nicolas”, cual trabao di Fase 1 a cuminza luna pasa dia 9 di Juni riba Zeppenfeldtstraat, cu ta e caya dilanti famoso Teleshop di Setar na San Nicolas... ningun hende no a pensa un rato riba e nificacion di e caya hancho aki pa Paradanan di Carnaval, incluyendo e famoso Jouvert Morning Parade cu ta pasa riba e parti ey for di rotonde dilanti Nicolaas Store bay te na e sucursal di CMB Bank net na entrada di Caya Principal.

   Pasobra awor numa varios persona a bin descubri, cu e pida caya aki a wordo haci hopi mas smal, pa asina e diseñador a crea aceranan mas amplio banda di Parada di Stop di Arubus, Teleshop di Setar y e oficina di Post Aruba NV.

   Prome Fase ta encera amplia e acera, haci e caminda mas smal, pone mas mata.  A crea un birada tambe net na e cruzada hunto cu Van Slobbestraat caminda kizas no a ni pensa riba vehiculonan pisa (truck cu trekker) cu ta bira eynan pa drenta Caya Captain Rodgers, y esaki ta bay bira un bottleneck dificil pa ora di organiza Parada di Carnaval.

   Ya tin reaccion: Publico cu a cuminza mira e trabao andando despues di un luna caba, y a nota con cambionan drastico a wordo haci, a cuminza cuestiona di con ningun hende di DOW, ni Arubaanse Wegenbouw, y tampoco San Nicolas Business Association no a cay riba e aspecto importante di Carnaval cu ta pasa riba e caminda aki prome cu e drenta den Caya Captain Rodgers pa sigui bay pa Lagoweg.

   Un di esnan cu a reacciona ta e president di Fundacion SMAC cu ta organizando Carnaval.  El a lamenta cu ora cu a traha riba e concepto, e planeamento, y traha e mapanan, di con no a check cu tur stakeholder, incluyendo Fundacion SMAC.

   E cambionan aki ta asina drastico, cu ya caba el a adverti cu si acaso otro aña pa Carnaval nan haci cambio di ruta na San Nicolas, por conclui caba cu Gobierno, Ministro, DOW, y demas experto a introduci cambio lubidando completamente riba Carnaval.  Pasobra manera cu ta mirando e forma cu ta trahando acera y e birada, ta parce cu lo bay tin hopi Roadpiece di Gruponan di Carnaval lo no por bay pasa eynan.

   Truck di musica lo no por pasa: Ta con trailernan di musica, trailernan di bar, y carozanan lo por bay bira na e birada ey, ta un pregunta cu kizas genionan di DOW so lo sa con pa contesta.  Pa hopi siglo tabatin e reclamo cu ora cu DOW diseña un T-weg na Aruba, cu nan ta gusta traha esaki lo mas smal posibel, siendo cu otro paisnan ta haci un T-weg of un birada masha grandi.

   Reaccion di algun Carnavalista di San Nicolas, ta cu e diseño y cambionan drastico aki a marca un fin pa un tan gusta ruta di Carnaval.  Nan ta realistico y ta mira cu ningun Roadpiece di luho lo no por pasa door di e birada aki net pariba di Teleshop di Setar.

   Bo no por lora bay pabao dilanti Setar mas tampoco!  E caya a bira hopi smal y net dilanti unda tabata CMB Bank a pone asina un acera, y dificilmente truck por tuma e birada pa drenta Caya Captain Rodgers.

   Y ya caba e construccion ta andando, y sigur DOW lo no bay kibra e caminda mas.  E bottleneck aki sigur lo bay nifica cu e ruta di Zeppenfeldtstraat cu Caya Captain Rodgers (antes conoci como ‘Grensweg’ pa pasa dilanti BSL Laundry) y tambe Lagoweg a pasa pa pasado.

   E ta un discusion cu den pasado a yega di bin dilanti caba, e.o. ora cu DOW a dicidi pa pone dos verkeersplateau den Vondellaan net riba e ruta di Paradanan di Carnaval.

   Ta di bay mira ki desaroyo lo sigui cu e proyecto di Revitalizacion di San Nicolas aki, cu lo por haya e nomber di ‘Destruccion Carnaval di San Nicolas’ tambe.