Blackout di Diasabra merdia ocasiona ora varios motor RECIP a paga

Paraliza Aeropuerto y Comercio

• Algun bario a haya coriente den 90 minuut
• Otronan a haya bek te despues di 5 ora 

ORANJESTAD (AAN): Tur cos ta mustra cu e trabao di mantenimento planea pa un sector di WEB Aruba NV a confronta dificultad enorme, cu diripiente banda di 12:30 pm riba Diasabra a ocasiona un serie di storing, cu na final e sistema di seguridad na e planta di awa y energia a activa y a desconecta henter e isla pa evita cu e lo por escala y afecta mas sector di e planta.

   Consecuencia di esey ta cu coriente a bay completamente rond Aruba.  No obstante cu parke di molina ta draai, y cu diferente parke solar rond di e isla ta sigui produci coriente, pueblo no tabata haya esaki.

   E blackout aki a cuminza afecta inmediatamente diferente instancia importante riba e isla, incluyendo Hospital, Aeropuerto, pompnan di WEB pa presion di awa den diferente bario, y tambe Hotelnan.  E instancianan cu tabatin generator, a logra cende esaki pa por a sigui funciona.

   Pero no ta tur Hotel tin generator pa cubri tur cos, pues e.o. chillernan grandi di airco a keda sin wordo cendi.  Aeropuerto di Aruba no tin generator cu suficiente capacidad pa cubri tur tres terminal di check-in, ni esun di arrivals, y mucho menos sectornan di Gate.  Y esey a socede net riba Diasabra cu tin monton di vuelo pa sali.

   Informa Prome Ministro: Algun rato despues, Prome Ministro mr. Mike Eman a haya notificacion for di Director di WEB Aruba NV, ing. Alfredo Koolman, cu e tecniconan di WEB tabata haciendo un trabao di mantencion na momento cu un fayo tecnico a tuma luga. Minister President Eman haya tur detaye di kico a tuma luga. y e trabaonan cu ta haciendo pa pone e planta di WEB bek den operacion.

   Pa e suministro di coriente, e director di WEB a splica cu nan ta a den coordinacion cu NV Elmar y a informa cu ta spera cu den 1 ora y mey pa 2 ora por cuminsa suministra coriente bek.

   Buscando fuente di problema: Mientras tanto, diferente hefe halto, supervisor, y expertonan tecnico a aglomera na planta di WEB Aruba NV na Balashi pa asina purba haya sa loke a socede.  Net durante di trabao di mantenimento, varios motor RECIP a bay for di servicio, y esaki a ocasiona e blackout.

   Pero prome cu por djis start nan bek, tin di analisa tur loke a socede prome cu 12:30 pm pa asina controla e serie di evento cu a trece e situacion cu nan a stop di funciona.  Despues cu a logra haya sa tur e situacion di ekiponan di produccion di energia, e ora personal di Storing a tuma over pa bay ‘reset’ e sistema di control y monitor.

   Mas di 80 minuut despues cu coriente a bay, a cuminza start e ekiponan di RECIP bek.  Ta conoci pa hopi tempo cu esey ta un proceso hopi delicado y segun protocol por start uno so, y despues pasa pa start otronan, etc.  Ademas e restart ta socede na forma lento, como cu e tin di sigui un forma balanza entre produccion y demanda pa no haya recaida (set back) pa cuminza full di nobo atrobe.  Personal di WEB ta bon entrena den esey, y sa bon con pa haci bon restart.

   Cuminza duna coriente: Ya pa 2:00 pm, a haya suficiente coriente produci pa e prome motor RECIP, cu a cuminza pasa electricidad pa lineanan di NV Elmar.  E promenan cu a haya coriente ta un parti di Santa Cruz y parti di Pos Chiquito.

   Pa 2:20 pm, ya a manda coriente tambe pa Sabana Blanco, Paradera, Wayaca, y Cumana.  Pa 2:25 pm a cuminza manda coriente den area di Kooyman Megastore, Paardenbaai, y Punta Brabo.  Pa 2:30 pm a manda coriente pa area di Manchebo Beach Resort.

   Mientras cu ta sigui genera mas capacidad, ta manda coriente pa Elmar.  Asina pa 2:45 pm a manda coriente pa Shelpstraat, pa ImSan na San Nicolas, pa Hospital, y pa Aeropuerto.  Esey nifica cu Aeropuerto a keda riba di 2 ora sin coriente.

   Pa 3:00 pm a cuminza duna coriente na Palm Beach y tambe Bubali.  Pa 4:00 pm a cuminza manda coriente pa San Nicolas y Piethein.  Pa 4:20 pm a duna coriente na Tanki Leendert, parti di Pos Abao, y parti di Noord.

   Pa 5:00 pm a cuminza duna coriente na Dominicanessenstraat y vecindario, tambe a duna na Ponton y Saliña cerca.

   Pa exactamente 6:00 pm, WEB a indica cu nan ta dunando NV Elmar bek 100 porciento di coriente.  Pues e blackout a finaliza e momento ey.

   Comercio hopi afecta: Un biaha mas esnan cu a wordo hopi afecta, ta comercio riba Aruba cu riba Diasabra semper ta haya hopi movimento di cliente, principalmente ora cu ta trata comienzo di luna.

   Pero e biaha aki esnan cu a wordo afecta tambe ta Salonnan di Beyeza y estilistanan, como cu nan tabatin man yen di diferente anochi di Graduacion di Scol, y di atardi caba clientenan tin cita poni pa nan bay haci nan cabey, cu makeup, y haci huña, etc.  Pero sin coriente,  tur esaki ta wordo afecta.  E anochi ey kizas ta hopi dama a dicidi na bay Ceremonia di Graduacion sin cabey laba.

   Aeropuerto di Aruba a wordo hopi afecta tambe, cu rijnan bastante largo di pasaheronan cu diripiente mester a warda extra hopi pa no djis check-in, pero tambe pa por pasa door di Inmigracion, y pasa door di Security Screening cu e momento ey no tin ningun aparato di X-ray Scanning pa yuda nan.

   Varios Supermarket y demas tienda a djis cera nan porta debi cu nan no tin forma pa atende caha, y paden a bira demasiado cayente y scur pa haci compras.  Ta algun Supermarket grandi so tabatin generator cu a sigui atende publico y cu airco bon frieu.  Toch sinembargo a confronta problema despues cu pagonan cu carchi di Debit a keda stagna y no a keda funciona bon henter atardi.