E reptil cu a ser mira na Bonaire ta un especie di ‘Saltwater Crocodile’

Varios lector a reacciona

ORANJESTAD (AAN): Diferente reaccion DIARIO a ricibi Diahuebs di lectornan cu a reacciona riba e hecho cu na beach di Sorobon na isla di Bonaire, a bin mira un Crocodil cu ta como 5 of 6 meter largo.  Mesora Gobierno di e isla a tene un conferencia di prensa pa prohibi publico di acudi na e beach di Sorobon, of drenta lama.  Tambe a duna prohibicion pa haci esey na Lac.

   Na Bonaire tabatin hende ta puntra di e ta un Crocodil, of un Cayman, of un Alligator.  Pero hopi lector di DIARIO a mustra cu tin un especie cu ta existi cu yama na ingles “Saltwater Crocodile”.  Aunke su principal habitat ta den area di Asia, pero a wordo mira observa den henter e region di Indonesia, y hasta costa panort di Australia.

   Lo mas interesante, ta cu e Crocodil aki di awa salo, a wordo haya tambe na costa di Mexico, na varios pais den Centro America, costa di Ecuador, Colombia, Venezuela, y a yega di wordo mira na Trinidad & Tobago, Martinique, Republica Dominicana, Haiti, Cuba, Cayman Islands, y tambe Jamaica.

   Saltwater Crocodile cu ta adulto tin promedio di largura di 5 meter.  Aunke a yega di mira algun cu a rek y yega te 7 meter largo.  En general, e Crocodil macho semper ta hopi mas grandi cu e Crocodil muher.

   E por biba den lama salo, den rieu, y riba tera.  E ta e di tercer animal amfibio di mas grandi, y por yega peso di 1.900 kilo.  Nan por ta peligroso tanto pa humano y otro animalnan.  Nan por move hopi rapido mes den lama, y tambe riba tera.  Nan a yega di mata hende, pero esey no ta socede hopi biaha.  Saltwater Crocodil por keda keto sin move pa hasta 1 ora largo, y nan por bula te cu 2 meter halto tambe.

   Den lama nan cuminda faborito ta pisca, tortuga, congla, cangreu, kreeft, y tambe ta come parha, of animalnan cu ta yega cerca di awa.

   Te cu Diahuebs merdia 2:00 pm ainda nan no a logra captura e Crocodil aki na Bonaire.  Nan a mire varios biaha, y personanan a saca hopi potret, incluyendo esun aki unda bo ta mire ta sambuyando bao awa pa bay pasa bao di un Pier.   Na Bonaire a hasta pone canasta tur rond na Sorobon, pero e reptil ta mustra di ta mas grandi cu nan.