Introduccion di Delta Plan pa adulto mayor ta bay zorg pa hisa nan calidad di bida y di cuido

Minister Ursell Arends:

ORANJESTAD (AAN) – Minister demisionario Ursell Arends, encarga cu e carteranan di Transporte, Naturaleza, Integridad y Adultonan Mayor, den un entrevista cu DIARIO a expresa cu desde cu Aruba a sali for di e pandemia, y gobierno a compromete su mes hunto cu Hulanda, pa yega na cierto porcentahe di surplus, a logra esaki den e ultimo tres añanan.

            “Pero no ta asina cu como gobierno por gaba cu un surplus, siendo cu den bo mesun comunidad bo tin deficit tur caminda”, e dignatario a expresa.

            El a agrega cu esaki ta e caminda cu mester para keto y garantiza cada un di e ciudadanonan, y specialmente e adultonan mayor, nan dignidad economico, y esaki ta loke nan ta trahando riba dje, e mandatario a señala.

            “Mester bisa cu vooral e Ministerio di Adulto Mayor a traha hopi cos p’asina garantiza un bon calidad di bida pa cada un di e adultonan mayor cu ta forma parti di nos comunidad, unda nos a introduci un Delta Plan cual ta bay zorg pa diferente paso, cu ta hisa e calidad di bida, pero tambe ta atende cu e calidad di cuido, ora un adulto mayor mester di dje.

            “Nos a organiza tambe e ‘zorgzwaartepakket’ cu desde 2025 lo bay na vigor. Esaki ta garantiza y organiza na un forma landelijk, cu cada cas di cuido cu ta brinda servicio na adulto mayor, kico ta e rekisitonan pero tambe kico ta cada deber di e cas di cuido, y kico ta cada tipo di servicio cu nan por duna na e adulto mayor”, minister Ursell Arends a señala.

            El a agrega cu ya caba el a bisa cu tin diez proyecto di pasadia, di cual tin tres activo caba aworaki, y esakinan tambe ta pa adultonan mayor cu kizas ta biba den soledad, cu no tin entrada pa por yega na un alimentacion adecua, y na e pasadia di mainta te cu atardi p’anochi, ta brinda nan un actividad pa ta activo, socializa cu otro adulto mayor, pero tambe ta brinda nan un cuminda cayente tur dia, conhuntamente cu Fundacion pa Nos Comunidad, manera DIARIO a relata den edicion di Diahuebs.

            “Pero mi mester bisa cu tin diferente otro aspectonan cu nos mester traha riba nan y cu ta cosnan na largo termino. Mi tambe kier a  haci cambio inmediato, pero tin otro aspectonan cu ta dura un tiki mas, pero mi por garantiza cu nos lo traha riba nan, p’asina aki beneficia nos adultonan mayor. Nos no por perde for di bista, cu ta nan ta esnan cu a traha duro pa crea e Aruba cu nos ta hereda aworaki, y ta nos deber pa duna nan un bon calidad di bida y un bon calidad di cuido” Minister Arends a conclui.