E proyecto di Plan di Mayor a bira realidad

Bienestar di nos muchanan ta prioridad

ORANJESTAD (AAN): Prome Minister Evelyn Wever-Croes tabata presente e siman aki hunto cu Minister Rocco Tjon, na Centro pa Hoben y Famia, na unda a tuma luga e "soft opening" di e Loket di Plan pa Mayor. Prome Minister a splica cu Aruba ta conoce un di e porcentahenan mas halto di divorcio, y hopi biaha un divorcio no ta un proceso placentero.

   Importante si ta, pa semper, si tin yiunan envolvi, tur decision cu worde haci, durante e proceso aki, ta na bienestar di nan. Aki ta unda e proyecto di Plan di Mayor ta di gran beneficio, pasobra e ta brinda e asistencia necesario, riba con pa tuma e miho decisionnan na bienestar di e yiunan.

   Na momento di un divorcio, semper tin un di e mayornan cu tin mas di perde, pero na final e yiunan no mag worde perhudica. Tambe hopi biaha e persona den e proceso, ta sinti cu esaki ta algo personal y no ta desea di papia cu niun hende. Pero estudionan cientifico ta demostra cu ayudo ta importante, y ta necesario pa tuma e ayudo aki, specialmente pa e yiunan, pasobra nan ta e factor principal durante un divorcio. Aworaki cu e proyecto di Plan di Mayor, mayornan por haya e asistencia necesario, riba con pa tuma e miho decisionnan den bienestar di e muchanan. E proyecto aki ta yuda pa e parehanan no wak otro como ex pareha, sino como mayornan di nan yiunan. E ta na su luga pa semper brinda e yiunan e miho trato cu e mesun alegria cu dia cu el a nace.

   E Plan di Mayor, lo worde ancra den ley prome cu fin di aña, y lo bin cu e obligacion na mayornan, ora di separa, pa tin un plan di con ta bay atende cu e muchanan. No mas loke hues of voogdijraad ta bin cu ne, sino un plan cu e mayornan ta sostene y duna tur di nan mes pa bienestar di e muchanan.

E muchanan semper mester keda e prioridad, y nan tin derecho pa ta feliz y por desaroya sin mucho problema den bida. P’esey e proyecto aki ta importante.

   "Mi kier gradici tur esnan cu a haci e proyecto aki un realidad. Un danki na Minister Rocco Tjon pa a duna tur di su banda pa e proyecto aki continua, y cu awe nos por a yega asina leu. Tambe un danki na Michella Steenvoorde-Lacle cu ta e motor tras di proyecto aki. Si no ta pa boso cu a insisti riba esaki, awe nos no lo tin e herment importante aki pa brinda esnan cu tin mester di e ayudo.

   Tur dia tin retonan den nos caminda pa loke ta e situacion financiero, y tambe riba hopi otro cos mas, pero e tipo di temanan aki no mag di keda sin haya atencion. P'esey un danki di curason, y pabien cu e logro aki. Mi ta spera cu tur mayor haci uzo di tur e apoyo cu nan por haya di e proyecto aki", Prome Minister a expresa.