Lenny Geervliet, Coordinador proyecto:
ORANJESTAD (AAN) – Lenny Geervliet, Coordinadora di e Proyecto 125, cu ta e liña di telefon gratis pa e grupo di adulto mayor, a duna di conoce den entrevista cu DIARIO, cu nan tin mester di boluntario.
El a bisa cu e proyecto ta bayendo basta bon, y nan ta habri tur mainta durante e siman, di dialuna pa diabierna, di 8.30 or pa 12.00 or.
Lenny Geervliet a señala cu nan deseo ta brinda servicio 24/7, y keda habri den fin di siman tambe, pa e adultonan mayor cu ta na cas y cu tin e contacto cu # 125, pa sinti nan mes menos isola, y tambe cu si mester of nan ta desea, nan por wordo referi na cualkier di e instancianan cu por duna nan e ayudo cu nan mester.
FALTA BOLUNTARIO:
Lenny a trece dilanti cu loke nan falta aworaki ta boluntario. “Nos ta duna training, dus bo ta haya e guia ora bo ta cuminza. Nos tin un grupo di siete persona, trahando activamente aworaki, y mi no ta inclui mi persona como projectleider, ni mi colega cu ta un trahado social. Si nos tin hende, pa cualkier motibo, nos ta atende e telefon, cu ta un liña pero dos telefon, pues nos por tuma dos yamada pareu”, señora Geervliet a comenta.
El a agrega cu loke nan a pidi riba social media, e website di Kibrahacha ta cu nan mester di mas boluntario. “Mi kier cuminza un grupo nobo pa start training na November. Si tin hendenan eyfo cu ta desea di tin un bunita trabao boluntario, e ta algo cu ta duna bo hopi satisfaccion. Djis un combersacion por haci un diferencia hopi grandi den un adulto mayor, cu no tin un hende banda di dje awe, pa por combersa un rato, puntra con su dia a bay, of cu ta tranca cu un problemanan chikito na su cas, pa nos ta un telefon cu bo por yude un tiki, bay dilanti, of dune un informacion cu e tin mester di dje” Lenny a subraya.
El a agrega cu e persona boluntario ta sinta na telefon den un oficina chikito pero hopi agradable pa sinta eyden. E boluntario mes por dicidi ki ora e kier traha. Tin hende ta traha mitad mainta, tin cu ta traha dos mainta, y esaki ta wordo regla den dialogo cu e persona cu ta bin traha como boluntario. E training, dependiendo di e grandura di e grupo ta consisti di cinco encuentro di dos ora, y e persona ta haya training practico. Pues, no solamente teoria y ta ameno, pero ta algo cu e boluntario mester si.
