E prome remodelacion di Oranjestad a tuma lugar den decada 80

ORANJESTAD (AAN): Durante e presentacion di e proyecto Oranjestad, Prome Minister Evelyn Wever-Croes a haci su introduccion papiando riba strategia. Haime Croes, director di DIP a elabora riba e parti di maneho y Director di DOW, Marlon Croes a pone enfasis riba e parti di infrastructura.

Croes a duna un splicacion riba unda ta para na e momentonan aki y unda kier bay. El a bisa cu un parti importante ta e contribucion di e sinergia y con ta complementa otro pa logra proyectonan grandi pa Aruba.

Ta wak e parti aki den desaroyo, a bisa, pero no ta gobierno su so por haci tur cos. Sector priva tambe tin cu haci su parti pa por engrandece Oranjestad. Gobierno tin un rol hopi importante di crea e facilidadnan y ta e catalisador pa crea e ambiente unda cu e ta bira atractivo pa e sector priva por inverti, Marlon Croes a splica.

Bayendo bek un tiki den historia, el a indica cu conoce Oranjestad for di 40 pa 50 aña pasa como un caya unda trafico tabata core den dje. E prome remodelacion a tuma lugar den decada 80, unda cu a cera e caya, a elimina parkeo, a pone e caminda mas smal y a pone vegetacion, baki mata.

Despues di 35 aña, recientemente a haci un remodelacion grandi den dje. Aunke a haci tur e inversion aki como gobierno, den transcurso di añanan e no a duna e resultado cu tabata desea di capitalisa riba dje, Croes a expresa.

E vision di gobierno ta pa keda pusha, crea infrastructura, espacio di ley, crea e ambiente pa sector priva por inverti.

Durante di e ultimo remodelacion a traha hopi riba e circulacion di trafico y pa diferente parti di Oranjestad por ta mas accesibel. Tambe a traha pa drecha e infrastructura di utilidad, pa loke ta e sistema di riool y tuberianan di awa.

E sistema di riolering por ehempel ta data for di añanan 50-60 y ta bastante bieu y mester a renoba esaki.

A trece un tram for di e punta di waf te na e punta di Nicky Habibi cu e intension di transporta un 70% di e pasaheronan crusero y trece nan den Caya pa por haya e interaccion entre e comerciante y e turistanan.

Croes a lamenta cu lamentablemente esey no a duna e resultado cu a spera. "Nos tin cu bay check unda e ta pega.

Tin cu bay drecha e cayanan den banda, Caya Betico mes for di Welcome Plaza, Schelpstraat trece aden den Caya Betico. Tambe tin cu bay drecha e cayanan cu ta na banda. Tin cu bay haci inversionnan grandi pa por mehora esaki, e director di DOW a duna di conoce.