ORANJESTAD (AAN): Den fin di siman, Conseho di Ministro di Reino na Den Haag a tuma un decision hopi severo, esta cu por lo pronto nan lo no duna OK pa suministra e di seis tranche di sosten financiero na Curacao, ni St. Maarten.
E decision aki a bin debi cu nan ta mira cu Curaçao y St. Maarten pa gran parti no ta cumpliendo cu e condicionnan pa asina por ricibi e di seis tranche di sosten di liquidez.
E isla di Aruba si ta cumpliendo suficientemente cu e condicionnan pa haya e di seis tranche. Tin solamente algun parti chikito cu tin di negocia, pero Hulanda lo bay manda 181 miyon Florin pa yuda cubri e costo di e di tercer cuartal, esta pa Juli, Augustus, y September.
Na comienzo, CFT a duna conseho pa Hulanda duna 168 miyon Florin na Curacao, y tambe 48 miyon Florin na St. Maarten pa e di seis tranche. Pero debi cu e dos islanan aki no a cumpli cu e condicionnan, Gobierno di Reino a dicidi pa bin cu mas condicion y liña di tempo pa pago di e tranche.
Pa Curacao, awor Reino Hulandes a dicidi pa dividi e di seis tranche den dos parti, esta 75,5 miyon y 92,5 miyon. Esaki a socede pasobra apenas recien un Gobierno nobo a wordo forma na Curacao. E motibo pakico Curacao a haya ‘NO’ como contesta, ta debi cu nan tin di aproba tres ley cu ta parti di e condicionnan cu Gobierno Hulandes a impone pa asina ricibi sosten di liquidez. E proposicion di ley aki a wordo entrega na Februari caba na Parlamento. Di tur tres proposicion di ley, solamente uno ya caba a wordo implementa, pero e no tin base legal: Esta e reduccion di 25% den pagonan na Ministro y Parlamentarionan.
E otro dos proposicionnan, cu ta pone un plafond na e beneficionan cu top funcionarionan di Gobierno lo haya, y tambe un reduccion di 12,5 porciento den e beneficionan total pa Ambtenaar y empleadonan den sector semi-publico, ainda ta den consulta na Parlamento y no a wordo implementa. Te ora cu tur tres ley drenta na vigor, e ora Conseho di Ministro di Reino lo por duna OK pa asina nan haya e di seis tranche.
