E prome grupo di studiantenan a yega Hulanda

ORANJESTAD (AAN): Informe di Hulanda ta indica cu Diadomingo cu vuelo 765  di KLM a yega e prome grupo di studiante Arubano pa sigui un estudio avansa na nivel di HBO of Universidad na Hulanda.

   Manera DIARIO a anuncia siman pasa, un total di 24 studiante a yega y lo bay studia na e ciudadnan di Tilburg y Eindhoven. Diaranzon 2 di augustus e di dos grupo y tambe esun mas grandi lo bin Hulanda.

   Na Schiphol e studiantenan mescos cu tur aña a worde saluda pa Minister Plenipotenciario mr. Ady Thijsen y director a.i. di Arubahuis drs. Glenda Hernandez. Un biaha mas tabata tin un delegacion consistiendo di functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.

  Mester bisa cu e grupo di studiante a sali basta liher cu nan maleta. Akinan na un forma bon coordina y organiza a haya instruccion di personal di Arubahuis, mentor y miembronan di e POC con pa cana y unda nan mester a para den grupo pa warda nan turno pa bay na e bus cu lo hiba nan Tilburg of Eindhoven.

Na Schiphol tabata tin un camara man di e programa Leu foi Cas pa graba e yegada y haci algun entrevista cu e studiantenan. Roy Kelly di e website Arubiano cu tambe a saca potret di e studiantenan.

  Awe Dialuna e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

   E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis.  E potretnan ta cortesia di Arubahuis.