MAICAO: Autoridadnan Colombiano a tene un razzia na un cas di bario Vincula Palacio na Maicao, unda a bin haya un cargamento di cocaina scondi.
Den e razzia aki, nan a detene cinco persona cu tabata na e cas e momento ey den oranan di madruga.
E droga a pisa 24 kilo, y test a demostra cu e ta cocaina di pureza halto, y tabata tur primi den otro y warda den pakinan di plastico.
Cuatro di e detenidonan ta Colombiano, y uno di nan ta procedente di Siria.
Esnan deteni ta Jazán Charten di 45 aña, Eduardo Luis Meza Quintero di 21 aña, Albert Andres Martinez Mejia di 38 aña, Salomon Jair Meza Berardimelli di 40 aña, y Marcos Tulio Peñalosa di 43 aña di edad.
A confisca tambe un SUV tipo Toyota 4Runner cu plachi number Venezolano, y tambe cinco smartphone di e hendenan aki. E persona Sirio parce ta esun encarga pa haci negociacion cu esnan cu a suministra e droga.
