E prome casino di St. Regis na mundo a habri den fin di siman na Aruba

ORANJESTAD (AAN): The St. Regis Aruba Resort ta anuncia cu orguyo e inauguracion di The Casino at St. Regis Aruba,

marcando un ocasion historico cu e presentacion di e prome casino di e marca St. Regis. E acontecimento excepcional aki ta introduci un destino sin igual pa entretenimento di casino, den un ambiente sofistica, di elegancia y cu un servicio personal cu ta eleva e oferta di luho riba e isla.

   Ubica paden di The St. Regis Aruba Resort, cu a celebra su gran apertura dia 22 di januari ultimo, e casino ta ofrece un seleccion exkisito di wega tradicional di mesa, slotmachine y kiosk di sportsbetting. The Casino at St. Regis Aruba ta brinda un ambiente refina y liber di huma pa huespednan exigente, residente local y biaheronan internacional.

   Den e curason di e casino ta haya Ventura Bar, caminda luho y elegancia ta uni na e energia vibrante di entretenimento. Ventura ta ofrece un seleccion exclusivo di e miho bourbons, whiskies y cogñacs, hunto cu cocktailnan traha door di experto. E bar dinamico aki ta crea e escenario perfecto pa momentonan inolvidabel, combinando e emocion di e casino cu e spirito alegre di Aruba.

   Durante e ceremonia di inauguracion, Oliver Reschreiter, Gerente General di The St. Regis Aruba Resort, a expresa:  "E apertura di The Casino at St. Regis Aruba ta marca un momento decisivo pa e marca St. Regis door di presenta su prome casino. E espacio aki ta refleha nos compromiso solido di ofrece experiencianan fascinante y personalisa. Cu su diseño elegante, campañanan emocionante y premionan exclusivo, nos anfitrionnan ta encanta di eleva bo anochinan cu un servicio excepcional y un entretenimento inigualabel."

   E ceremonia a inclui un cortamento elegante di cinta.  Na esaki a participa Joseina Di Donato, Rubiela Croes y Daniel Kervel for Caledonia Properties, y general manager Oliver Reschreiter, y Aldrich Tromp, Casino Manager.