Formador Gerlien Croes, lider di FUTURO:
*E siguiente gabinete lo tin siete minister
*A cuminsa papia riba reparticion
ORANJESTAD (AAN) — Gerlien Croes, Lider di partido FUTURO y Formador di Gobierno nobo, hunto cu señor Mike Eman, Lider di AVP, den un declaracion pa DIARIO, a reitera cu ambos partido tabata tin reunionnan planifica cerca Gobernador Alfonso Boekhoudt.
E reunion aki tabata esun prome cual intencion tabata pa duna Gobernador un bista amplio di e desaroyonan andando ultimo simannan y nan a constata cu enberdad e proceso ta tuma su tempo, y esey ta loke nan a bin ta comparti ultimamente.
“Nos sa cu pueblo ta na spera y kier sa kico ta e ultimo stapnan, pa locual ta e maneho di gobernacion di nos pais. Nos tin cu tene cuenta tambe cu despues cu a pasa un ley, pa locual ta screening y e proceso di formacion di gobierno tambe a tuma su tempo, y lo sigui tuma su tempo den e procesonan cu nos ta bay encamina”, Gerlien Croes a indica.
Croes a señala cu lo mas importante cu a tuma lugar Diabierna mainta ta, cu e partidonan a yega na un base di acuerdo, unda cu e puntonan di salida cu nan a yega na dje, ta suficiente pa nan bisa cu tin posibilidad y nan ta wak esaki, pa yega na un coalicion.
El a comparti cu e siguiente gabinete lo tin siete minister, y a cuminsa papia tambe riba e dominio di reparticion di esakinan, y den un siguiente fase lo nan ta bay comparti e detayenan di esaki.
“Pero locual ta mas importante ta e base di confiansa cu e proceso aki a trece pa cada un di nos como partido. Nos ta bisa, nos tin un base cu nos por traha cu otro. Aruba tin hopi reto su dilanti, pero mi ta kere, Aruba tin hopi oportunidad tambe. Anto, a yega e momento pa Aruba conoce un Gabinete cu ta bay enfoca riba e di dos”, Gerlien a expresa.
El a agrega cu pa hopi aña retonan ta bin pero a lubida cu e comunidad aki mester wordo inspira di nobo, y esaki tambe mester refleha den e Gabinete aki.
“Realidad ta tambe cu nos a bin cu pensamentonan diferente, cu pensamentonan moderno den reparticion tambe, pero esaki na e momentonan debido nos ta bay reparti, pero sigur mi ta kere cu e base cu tin na e momentonan aki, ta cu nos ta bay atende primordialmente cu e situacion cu Hulanda, e situacion financiero, y e oportunidadnan cu tin na e momentonan aki ta lidera nos pensamento, tambe e ciudadano cu aworaki tin mester di un ahuste, un alivio”, Gerlien Croes a subraya.
El a señala cu tur dos punto di salida, ta cu nan a papia hopi bes di empodera e ciudadanonan. “Nos sa cu na e momentonan aki, e situacion no ta facil, pero nos tin cu bay busca oportunidadnan y cambia e forma con nos ta atende cu e maneho di e pais aki, vooral financieramente, y duna atencion un rato na comunidad, na e hende local. Nos a bisa hopi bes cu e desaroyo economico a tuma over na nos pais, nos a enfoca grandemente riba esaki y nos a lubida un tiki riba e pueblo y aworaki esaki ta e puntonan di salida pa e siguiente Gabinete”, Gerlien Croes a enfatisa.
