E prome 'Ban Caya den Bario' di Piedra Plat tabata un exito

ORANJESTAD (AAN): E aña aki tawatin pa prome biaha e actividad "Ban Caya", den bario di Piedra Plat.

E organisadornan, CEDE Aruba, Bario Unico, IbiSA, hunto cu Fundacion Centro Famia Piedra Plat y Centro di bario Piedra Plat a uni pa hasi esaki posibel  "BAN CAYA CHRISTMAS EDITION 2023"

            Hunto cu demas organisacionnan y personanan individual a duna un caloroso bonbini na tur esnan cu a yega. Tawatin diferente actividad deportivo y recreativo, bishita di Santa Claus cu cada ratu a para pa saca potret cu tur hende durante su caminata y hasta Grinch a bin un rato mas despues.

            Tambe tawatin tentnan unda por a cumpra hopi cos cu ta tipico di e temporada aki, manera boyo di maishi rabo, ponche crema traha na cas di diferente sabor, matanan bunita pa dorna cura y hopi articulo cu por duna como regalo. Cuminda tradicional no a hasi falta, manera un dushi soppi di galiña y kukinan casero.

            Locual hopi bishitante a gosa mas hopi tawata e oportunidad di topa otro, tin bes despues di hopi tempo. Bunita recuerdonan di antes a keda compartí.

            Tawatin musica pa entretene y a termina cu un dushi dande. Cantante cu sombre den man a conecta nos tur den bario cu memorianan di nos infancia, hubentud y bida adulto. E tawata sigur un evento agradabel, dushi y ohala por bira un tradicion nobo den nos dushi bario di Piedra Plat y vecindario.