Premier Wever Croes ta expresa condolencia na famia di e victimanan di tragedia na lama
ORANJESTAD (AAN) Minister Presidente Evelyn Wever-Croes, den conferencia di prensa Diahuebs mainta, prome cu referi na e tema di digitalizacion di Kadaster, a expresa su sentimentonan di condolencia y solidaridad di su persona, Gobierno y comunidad, pa e tragedia cu pueblo di Aruba a habri siman cu ne, ora cu un boto procedente di Venezuela a bolter cerca di nos costanan, den lama bruto, unda cu cuater persona a fayece.
“Mi ta comunica cu comunidad di Aruba awe, cu un curazon tristo, pisa y preocupa. Mi no ta kere cu tin palabranan adecua pa expresa e dolor cu e famianan di e victimanan na Venezuela, y aki na Aruba, por ta pasando aden, specialmente den e temporada dificil aki di Pasco, ora ta perde un ser kerido. Den nomber di Gobierno di Aruba mi ta extende palabranan di profundo condolencia, na e famia, e sernan kerido di e victimanan y cu nan por sosega na paz.
“Tin biaha nos ta referi na personanan indocumenta, cu ta bin na un forma ilegal. Pero laga nos corda awe cu ta trata di hendenan. Hende muher, hende homber, mi a compronde cu dos prima; tin un cu a laga yiunan atras, pa nos convivi cu nan dolor.
“Nos departamentonan di gobierno ta moviendo recursonan pa por yuda nan famianan; asisti e famianan di e victimanan y na mes momento nos ta investigando e caso aki tambe, pasobra e ta un caso serio cu nos mester keda investiga y subraya. Nos ta atendiendo tambe cu autoridadnan Venezolano pa nan tambe asumi nan responsabilidad, den e situacionnan aki.
“Mi kier enfatiza un biaha mas cu apesar cu Venezuela ta basta cerca di Aruba, un viahe asina den boto, ta sumamente peligroso. Y cu nos a mira hopi victima caba den e trayecto aki, mescos cu e siman aki. Esnan cu ta aki na Aruba y cu ta invita e victimanan pa bin aki, talvez pa busca un miho futuro, berdad. Pero e momento cu ta invita nan pa bin via e trayecto peligroso aki, por fabor pens’e dos biaha. Gobierno so no por bringa e tipo di tragedianan aki, pasobra sernan humano nan ta, tata di famia, yiunan di famia, y hunto nos tin cu reconfirma nos compromiso cu nos ta bay percura pa esaki no pasa nunca mas.
“Mi a tuma contacto cu Consulado di Venezuela na Aruba, tambe cu Embahada di Reino na Caracas, p’asina nos por a expresa nos mensahenan di convivencia y di condolencia pa cu e sernan kerido di e victimanan aki. Den curso di e siguiente dianan nos lo bolbe riba e tema aki y splica un poco mas, kico gobierno ta haciendo pa actua cu man duro contra esnan cu ta sigui fomenta y stimula e tipo di tragedianan aki”, Minister Presidente a señala y a reitera cu ohala e cuater victimanan por sosega na paz. Y cu Dios duna nan famianan y sernan stima, hopi forza den e tempo dificil aki.
