Parlamentario Darlaine Guedez-Erasmus (MEP):
ORANJESTAD (AAN): Dialuna ultimo den reunion publico a aproba e presupuesto supletorio 2023 di pais Aruba. Den e presupuesto un proyecto hopi esencial a sobresali. E districto di Paradera ta na caminda di logra un acontecimento significativo den ta loke desaroyo educativo.
Parlamentario Darlaine Guedez-Erasmus di Fraccion di MEP, un persona cu a lanta den e districto di Paradera, a expresa su satisfaccion cu e noticia di un scol secundario nobo den nan distrito.
Den e presupuesto supletorio a destina Afl. 6.7 miyon pa construi un edificio completamente nobo pa e scol, un inversion cu ta marca un paso importante pa mehora e infrastructura educativo na Aruba, e Parlamentario a indica.
Parlamentario Guedez-Erasmus a resalta e importancia di e anuncio pa e distrito di Paradera, cu actualmente ta conta cu mas mucha entre 0 y 17 aña cu cualkier otro districto na Aruba.
E Parlamentario a subraya cu, cu e inversion aki, Paradera lo bira hogar di su prome scol secundario, un desaroyo cu ta di gran trascendencia pa e comunidad.
Den su comentario, Guedez-Erasmus a mustra di ta contento pa e muchanan di Paradera cu ta bay scol basico actualmente, ya cu nan por sigui nan educacion den nan propio distrito.
E prome scol secundario na Paradera lo brinda oportunidad pa e muchanan sigui nan estudio den nan mesun bisindario, fortaleciendo nan lasonan cu nan coleganan di scol y amigonan cu ta bay MAVO. E proyecto di construccion di Juliana School lo tin un enfoke completamente innovativo. E inversion den e scol nobo aki ta un paso importante pa sigui mehora e calidad di enseñansa na Aruba.
Parlamentario Guedez-Erasmus a expresa su confiansa cu e desaroyo di Juliana School ta un logro cu lo laga un impacto duradero riba e educacion y desaroyo di e hobennan na Paradera. Mi persona ta hopi contento di por a forma parti di e votacion den Parlamento pa asina Paradera haya su prome scol secundario.
