E problema di sushi riba caya a bin ta desaroyando desde fin di aña 2022 y habrimento di 2023

Director di DOW, Ing. Marlon Croes:

ORANJESTAD (AAN) – Director di Departamento di Obranan Publico, Ing. Marlon Croes, den entrevista cu DIARIO a declara, cu e problema di sushi riba caya a bin desaroyando su mes desde fin di aña 2022 y habrimento di 2023.

            “Tin diferente aspecto cu nos tin cu trece den consideracion, y cu sigur mester evalua. Un di nan ta cu no solamente DOW ta responsable pa e bista riba caya. Ta DOW, Serlimar y BCI (Bureau City Inspector, tin cu haci e trabao aki.  Ademas, no solamente e tres departamentonan aki; nos mes como comunidad mester contribui pa maneha, cuida nos bista di caya, y no susha Aruba”, segun comentario di director di DOW.

            Papiando di DOW mes, Marlon Croes a splica cu den e proceso di cambio di aña, nan a haci un cambio den nan operacion.

            “Nos a busca eficiencia y traha algo mas digital, y nos a schuif e responsabilidad tambe di wak e situacion di e trabao, na e contratista.  Nos responsabilidad ta controla y controla y pase na e contratista, y esey ta un di e cambionan mas grandi cu tin. Esey kiermen cu nos planning no ta den nos man directamente, pero ta den man di e contratista.  Y nos ta ripara cu esaki no ta dunando e frutonan necesario. Mi tin cu bisa cu esaki ta un cambio cu mester sosode cerca nos contratistanan pero cerca nos supervisornan tambe. Mester bay registra den e sistema, saca potret, haci un judgment di e area, si ta bon of si no ta bon, y a base di esey e contratista ta wak den su telefon y si e tin area cora, e tin cu cambia su planning. Pero e sinergia aki ainda no a tuma full lugar ainda, y e proceso ta tumando hopi tempo”, Marlon Croes a splica.