ORANJESTAD (AAN): Vitrina Exhibitions ta un ‘proyecto piloto’ cu ta enfoca riba e comunidad creativo y artistico di Aruba.
E meta ta pa ofrece un espacio di presentacion pa artistanan local como tambe actividadnan cu ta interesante y relevante pa e communidad creativo di Aruba.
Nan a invita tres artista local pa presenta algun di nan obranan existente den un di e vitrinanan di Wolff & Co. Studio, situa na e di tres piso di Royal Plaza. E vitrina aki a worde adecua como un espacio di exhibicion unda un y tur por pasa dilanti y admira e obranan na cualkier momento di dia. Cada exhibicion lo dura 1 luna y lo worde acompaña pa algun actividad relevante na e tema di e practica di e artista. E exhibicionnan lo tuma luga na Juli, September y November di 2023.
Vitrina Exhibitions a nace for di e deseo di Wolff & Co. Studio pa habri nan espacio na otro creativonan local. Ken Wolff ta elabora cu e studio a nace cu e vision di ta un espacio di creativonan pa creativonan. Banda di esaki, Plataforma Aruba su proyectonan semper tin como meta e desaroyo di e practica di artistanan visual di nos isla. Esaki ta worde realiza door di ofrece un pago (artist fee) pa e labor artistico como tambe creando material educativo y academico tocante e practicanan local aki, den nos idioma.
Pa e prome Vitrina Exhibition, nan a invita artista local Trudy Lampe. Durante pandemia Señora Lampe a exhibi e piezanan na Museo Archeologico pero door di e situacion, e exhibicion no a ricibi e atencion desea. Di akinan e idea a nace pa brinda den e studio un espacio pa presenta obranan pa otro artistanan. Señora Lampe lo presenta den e espacio aki algun di e urnanan y otro obhetonan cu e ta traha cu klei di Aruba uzando tecnicanan inspira pa e tecnicanan indigena.
E exhibicion lo tin su apertura dia 14 di juli di 7:00 - 9:00 pm y lo keda den e vitrina te dia 14 di augustus 2023. Durante e apertura lo tin un screening di e documental KimaTerra II.
Vitrina Exhibitions ta un colaboracion di Plataforma Aruba y Wolff & Co. Studio y ta worde realisa cu e sosten di Mondriaan Fund.
