Aruba a haya e prome ‘Financial Consulting firm’ estilo boutique

Edsel Lopez y Herbert van Elferen a lansa PFK Aruba

ORANJESTAD (AAN): Siman pasa a funda e oficina di PKF Aruba oficialmente na Aruba. PKF ta un compania mundialmente reconoci ariba e tereno di Consultancy, Audit, Tax y Accounting. Dos accountant confiabel y respeta na Aruba y den Caribe Hulandes, esta drs. Ing. Edsel Lopez RA y drs. Herbert van Elferen RA CIA ta tras di e nomber aki mundialmente reconoci.

   “Siman pasa nos a lansa un oficina nobo di PKF na Aruba. E ta un compania estilo boutique, chikito, pero cu ideanan moderno, creativo y innovativo. Nos kier brinda un servicio di tur tipo di financial consultancy pa e mercado di Aruba. Nos ta bon conoci den mundo di Audit, Accounting, Tax y Consultancy, pero den PKF Aruba nos lo enfoca mas riba e area di Consultancy” asina Edsel Lopez a anuncia cu un orguyo riba su cara.

   A funda e oficina di PKF Aruba aki hunto cu e meta pa inverti, desaroya, yuda e futuro generacion di profesional local crece y principalmente pa comparti nan experiencia y   conocemento cu nan clientenan. E comienso nobo aki hunto ta un bon ehempel di tin pasenshi, determinacion, lealtad, perseverancia, trabao duro y dedicacionan na cliente y na e comunidad local. PFK t’ey pa yuda tur persona agrega un balor adicional na nan negoshi, logra nan meta y bira e miho den nan tereno, cu un calidad di trabao riba nivel halto manera semper nan a sa di brinda nan clientela.

   “Nos ta hopi emociona pa tin PKF Aruba entre nos y nos ta mira futuro cu wowonan masha positivo riba con grandi e famia aki lo crece”, asina Cheryl Burke, Regional North America Coordinator y alavez Partner den PKF USA, a duna di conoce durante su reunion aki na Aruba. E organizacion ta conoci pa ta un lider den e industria di turismo y ta representa mayoria hotel di marcanan renombra. Como tal, PKF conoce Aruba caba di hopi aña pero desde siman pasa, awo tin un oficina oficial riba nos isla. 

   “Wel, pa hopi aña caba mi ta trahando den e industria di accountancy, di cual mayoria di e añanan ta aki na Aruba, awo ta momento pa hunto cu mi socio Edsel Lopez, nos cuminsa cu algo nobo pa brinda servicio personalisa y comparti nos experiencia cu e sociedad di Aruba.   Nos asset mas grandi ta nos experiencia, cu awo nos ta pone na disposicion di nos clientenan”, asina Herbert van Elferen a subraya.

   PKF lo ofrece e nivel di mas halto di servicio y experiencia tecnico di experto local y di rond mundo. E oficinanan di miembronan di PKF International tin un reputacion di excelencia den tur area di impuesto, advisory, auditoria y solucion comercial.

   Hunto ta compronde retonan cu e cliente ta enfrenta y e importancia di tuma decision firme y cu un enfoke flexibel den un ambiente compleho. Nan ta yuda bo haya solucion adecua di un forma rapido y sigur. Na PKF nan sa cu cada negoshi ta diferente. Ta pa e motibo ey mes ta adapta nan servicio pa satisface e necesidadnan specifico di cada cliente.