Cetty Baarh, Director FAVI:
ORANJESTAD (AAN)-- Den entrevista cu Matutino DIARIO, señora Cetty Baarh, director di Fundacion Arubano di Esnan Visualmente Incapacita (FAVI), a declara den entrevista cu Matutino DIARIO, cu e suma cu e fundacion mester yega na dje, durante e accion di donacion, ta entre 50 mil cu 60 mil florin.
El a splica cu e subsidio cu FAVI ta ricibi, conhuntamente cu e donacion y tambe otro proyectonan manera nan caminata, entre otro, ta sumanan cu ta yega pa FAVI por sigui draai henter e aña, pero tambe desaroya proyectonan importante pa e organizacion. “Kiermen nos ta spera di yega e meta di 50 pa 60 mil florin e aña aki”, señora Baarth a reitera. “E subsidio cu nos ta ricibi di e gobierno di Aruba, no solamente ta cubri salario di nos trahadornan, pero tambe parti di e aspecto operacional, anto e extra cu nos ta haci ta pa cubri e resto pero tambe extra proyectonan cu nos lo kier logra”, director di FAVI, señora Cetty Baarh a señala.
