E plan general di desaroyo di Baby Beach y Rodgers Beach no tin hopi cambio structural pero si visual

Andres Hernandez, presidente di SNBA:

ORANJESTAD (AAN) – Andres Hernandez, Presidente di San Nicolas Business Association (SNBA), a referi den conferencia di prensa, na e presentacion cu Minister di Salud y Turismo, Dangui Oduber, a haci relaciona cu e Master Plan Seroe Colorado.

El a bisa cu e proyectonan di Baby Beach y Rodgers Beach ta algo cu no ta bay wordo ehecuta di biaha, pero ta un propuesta di personanan cu tabata presente y cu tin di haber cu decision manera DOW, DIP, DNM.

Hernandez a bisa cu e presentacion tabata interesante unda cada un a trece su puntonan dilanti, cu tin di haber cu e desaroyo aki. El a agrega cu loke DOW a traha ta tremendo, hopi bon. “Nan ta papiando di traha riba loke tin construi caba, kiermen no ta bay destrui nada, y nan tin plan di corta e asfalt cu tin aworaki na Rodgers Beach pa extende e beach, hacie mas grandi”, presidente di SNBA a comenta.

Tambe DOW a papia di plantacion di matanan di coco, druif, y drecha loke tabata tin originalmente, y tambe a referi na e cambionan na Baby Beach, y recupera e area di tennis. Hernandez a subraya cu nan no ta papiando di bin cu un restaurant di 4 of 5 strea, sino di algo cu na San Nicolas ta custumbra cune, y cu turisticamente lo ta hopi positivo, pa loke ta trata pariba di brug.

Nan a papia tambe di drecha e parkinglot existente, y organice di un forma cu por wordo uza corectamente, y no manera e ta aworaki.

Hernandez ta kere cu e plan en general no tin hopi cambio structural pero si visual. Visual turistico y bon pa naturaleza pasobra ta bay wordo gana 800 meter cuadra, cu aworaki ta asfalt y cu lo bin bek pa bira santo blanco.

“Hopi mas no tin pa bisa. Nos no a ripara ningun impacto na termino largo cu ta negativo pa nos Isla ni pa nos lugar pariba di brug. Y, efectivamente, visualmente lo trece un avance natural pa loke pariba di brug por ofrece”, Andres Hernandez, Presidente di SNBA, a remarca.