E motibo principal di perdida di rifnan ta falta di claridad den meneho

Segun Christie Mettes di Metabolic Foundation:

ORANJESTAD (AAN): Christie Mettes di Metabolic Foundation a indica cu, aunke no a haci un estudio di casualidad pa comproba e causa exacto di e perdida di rifnan, den su opinion profesional e principal motibo ta relaciona cu e maneho di nos costa y e manera cu Aruba a desaroya diferente areanan durante e añanan. 

Den un entrevista cu DIARIO, Mettes a splica cu hopi biaha no ta tuma e presencia di rifnan na cuenta ora ta planifica of desaroya proyectonan. Segun e, hustamente den e areanan cu a experimenta e mayor grado di desaroyo, ta unda e perdida di rifnan ta mas evidente. 

Un di e riesgonan mas grandi pa e ecosistema marino, el a menciona, ta e cobamento di rifnan pa facilita proyectonan di infrastructura of otro actividadnan humano, proceso cu por causa daño permanente na e ecosistema. 

Metabolic Foundation, segun Mettes, ta participa activamente den diferente reunion cu stakeholdernan pa contribui na e discusion tocante e proteccion y maneho di rifnan rond di Aruba. El a señala cu e decision pa reconoce rifnan oficialmente como areanan protehi ta representa un paso importante den e direccion corecto. Sin embargo, e ta considera cu ainda tin falta di claridad tocante e maneho practico di e areanan aki. 

Tin piscadornan, famianan cu ta paga pa ranchonan y ta pensa cu nan ta doño di e rif. Tambe tin hopi desaroyo turistico riba rifnan y hasta a traha hotelnan riba rif, cu, segun el a enfatisa, no mag. Esakinan tur, el a menciona, ta door di falta di claridad riba e maneho di kico mag y kico no mag di haci riba un rif. 

“Mi ta kere cu esaki ta haci falta ainda den nos maneho colectivo. Pero mi ta kere tambe cu nos ta canando den e proceso corecto. Awo cu tin e reconocemento oficial di rifnan como areanan protehi, hunto cu e datanan aki, por yuda fortalece e maneho den futuro," el a afirma. 

Mettes a enfatisa cu ta importante mantene e rifnan limpi, evita corta mangelnan, specialmente tambe esnan cu tin rancho, pa stabilidad di e rancho. y conserva nan, inclusive den areanan unda tin ranchonan. Ta importante pa duna espacion na naturalesa pasobra e raisnan di mangelnan mes ta yuda wanta e santo pa proteha contra impacto di olanan.

"Si nos maneha e areanan natural den un manera responsable, nos lo por sigui disfruta di nan valor ecologico, recreativo y economico pa hopi generacion ainda," Mettes a conclui.