Pidi DIP pa busca e ‘overdrachtsdossier’ ora a pone Joe Laveist den man di ASU

Minister Gerlien Croes ta indica:

ORANJESTAD (AAN)-- Den entrevista cu DIARIO, den su calidad di titular di Deporte, Minister Gerlien Croes a bisa cu na su entrada como Minister, FFD (Fundacion Facilidadnan Deportivo) y ASU (Aruba Sport Unie, a dicidi di cera e facilidad di Joe Laveist Sport Park pasobra segun nan, e luznan ta den hopi mal condicion, y esey no tabata su responsabilidad.

   “Ora mi a drenta den e facilidad aki, a duel mi masha hopi mes pa wak un inversion cuantioso cu a wordo haci, despues di diez aña den ki estado e ta.

   E situacion di Joe Laveist ta asina aki, cu ASU ta doño di e facilidad, pero el a pone esaki den man di FFD pa despues nan manehe. FFD a bisa cu e no tin e capacidad pa haci mantencion manera cu mester ta, anto ASU a bisa cu nan por devolv’e e lugar aki. Na final di dia, tur dos organizacion ta wordo subsidia door di Gobierno. Kiermen tur dos ta cay bek den mes scochi”, e dignatario a señala.

   Mas of menos tres siman pasa, e mandatario a haci e peticion na DIP, cu cual e tabata tin un reunion, pa wak si nan por haya den e filenan cu nan tin e overdrachtsdossier cu tabata tin, pasobra e ta asumi cu gobierno cu gobierno a pone e facilidad den man di ASU, y cu ASU a bira doño, y cierto caminda mester tabata tin  cierto palabracionnan.

“Ami no por bay habri negociacionnan bek sin sa cual ta e palabracionnan haci e tempo ey”. Mi tin cu bisa cu ningun hende por haya e documento aki te ainda, mi a pidi ASU pa nan wak si nan tin algo den e file, pero intencion ta si, cu nos ta bay habri combersacion tocante e facilidad”, Minister Gerlien Croes a acentua.