Aruba y Barranquilla mas cerca cu ruta nobo di Wingo:

Minister di Turismo, Sr. Wendrick Cicila:

“Nos ta construyendo puentenan invisibel cu ta uni pueblo, famia y oportunidad” 

ORANJESTAD (AAN): Diahuebs 9 di juli, na Aeropuerto Reina Beatrix, a tuma luga lansamento oficial di ruta directo nobo entre Barranquilla y Aruba di aerolinea Wingo, cu un ceremonia special pa e prome buelo. Durante e evento, Minister di Turismo, Sr. Wendrick Cicilia, a describi e conexion nobo como un paso importante den e vision di Aruba pa fortalece su relacion cu Colombia y sigui amplia e conectividad internacional di e isla. 

Den su discurso, e minister a enfatisa cu conectividad ta hopi mas cu simplemente un buelo entre dos destino. Segun e, cada ruta nobo ta representa “puentenan invisibel” cu ta conecta pueblo, famianan, comerciante, cultura y oportunidadnan economico. 

“Aruba y Colombia semper a comparti un relacion fuerte, basa riba lasonan familiar, comercial, social y cultural. Nos tin e responsabilidad pa sigui fortalece y intensifica e relacionnan ey, y pa logra esey nos mester conectividad,” Cicilia a expresa. 

E minister a reconoce Wingo como un socio estrategico importante pa Aruba. Actualmente, e compania aereo ya ta conecta Aruba cu Bogotá, Medellín, Cali, Bucaramanga y, awo, tambe cu Barranquilla. El a menciona cu e conbersacionnan inicial pa e rutanan nobo a cuminsa na 2025 entre Wingo, ATA y AAA, y cu den menos di un aña e plan a bira realidad. 

Segun Cicilia, e exito di e proyecto ta resultado di confiansa mutuo, respet y colaboracion entre tur e partners envolvi. “Ora tin partnership fuerte, oportunidadnan grandi ta nace,” el a bisa. 

E ruta nobo ta habri posibilidadnan nobo pa turismo, comercio y intercambio cultural. Pa hopi residente di Aruba, e conexion directo cu Barranquilla ta nifica un caminda mas facil pa bishita famia of disfruta di eventonan iconico manera Carnaval di Barranquilla. Na mesun momento, e ruta ta facilita cu mas Colombiano por bishita Aruba, tanto pa recreacion como pa reuni cu sernan keri. 

Cicilia tambe a señala e importancia di e conexion pa turismo medico. Tanto Barranquilla como Bucaramanga ta destinonan reconoci pa tratamento medico specialisa, y hopi residente di Aruba ya ta uza e servicionan ey. E buelonan directo lo contribui pa haci acceso na e cuido medico ey mas facil y eficiente. 

Na fin di su discurso, e minister a expresa su gradicimento na Wingo, Aruba Airport Authority, Departamento di Aviacion Civil, ATA y tur e profesionalnan cu a contribui na haci e ruta posibel. 

“Esaki ta un momento di celebracion pa Aruba. Nos no solamente ta conecta cu mundo, sino cu nos ta fortalece ainda mas e amistad y cooperacion cu Colombia. Ora nos traha hunto cu cariño, respet y colaboracion, nos por crea oportunidadnan cu ta beneficia tur dos pueblo,” e minister a conclui.