E meta ta pa Xavier University bira e Harvard di Caribe

Presidente Ravishankar Bhooplapur: -  ORANJESTAD(AAN): Riba Diasabra den oranan di mainta, a tuma lugar cortamento di cinta na e edificio nobo di Xavier University School of Medicine cu ta awor na Hato, un tiki patras di Aruba Bank.

   Den oranan di atardi a sigui cu graduacion di un grupo di studiante.  Debi na reglamento y protocol pa mitiga brote di Covid-19, esaki a socede cu un grupo chikito.

   DIARIO a entrevista e President di Xavier University School of Medicine Aruba, esta señor Ravishankar Bhooplapur, kende tabata hopi anima cu e direccion nobo cu e scol ta tumando.

El a conta cu riba Diasabra tin 3 cos importante cu a tuma lugar.

E prome ta cu e edificio ta pa e studiantenan cu bin Aruba ta studia tin lugar di biba.

“Despues di inverti 30 miyon dollar den e proyecto nos ta contento cu awe nos por a corta cinta”, segun Bhooplapur.

El a splica cu a haci tambe e ‘groundbreaking’ pa fase 2 di e proyecto, cu ta un inversion di 40 miyon dollar pa construi un seccion academico completo.

E presidente a indica tambe cu pa prome biaha den historia ta bay haci graduacion di e studiantenan di Xavier na Aruba mes.

“Tur e añanan aki nos a haci e graduacion na Merca y e biaha aki nos kier a trece esaki pa e isla”.

Nos meta ta pa dedica nos mes na brinda cuido di salud na hendenan tur caminda na mundo, segun Bhooplapur.

El a sigui bisa cu mayoria di e studiantenan di Xavier ta bin di Merca y Canada, mientras cu tin otro studiantenan tambe di 26 otro pais.

“E parti cu mas nos gusta di Aruba ta cu e isla ta bendiciona cu bon tempo y mas importante, e habitantenan di Aruba a duna nos un bon bini pa por establece asina un bunita campus akinan”.

Nos intencion ta tambe pa pone Aruba bira e mihor destinacion pa cuido di salud, produciendo e docternan.

Aruba ta disfruta caba di e mihor turismo y nos meta ta pa den e añanan cu ta bin pone Xavier University bira e ‘Harvard’ di islanan di Caribe, segun e presidente kende a gradici pueblo di Aruba y tambe mandatario y politiconan, pa nan cooperacion.