ORANJESTAD (AAN) – Humberto Acosta, den entrevista cu Matutino DIARIO a comparti cu comunidad, un tiki di historia di e prome Gasoline Station cu nan a lanta den e Distrito di San Nicolas, cu ta Essoville.
Acosta a menciona cu actualmente e ta Operational Manager na Citgo Boulevard, cual nan a tuma over 16 aña pasa, pero locual e sa di Essoville ta cu, den tempo di Lago, el a wordo traha y funda; esta na aña 1956 door di famia Oduber, cu a traha basta aña den e mundo di refineria, pero aworaki nan ta un poco aleha di dje. Acosta a acentua cu famia Oduber tabata e fundador y nan tabata doño tambe di e station.
No obstante, 30 aña despues, cu Esso Petrolera a bin Aruba, a bende e gasoline station cu e refineria mes cu a tuma varios di nan, incluyendo Boulevard, Savaneta y Oranjestad.
Despues di Esso Petrolera a bin El Paso, tempo mas laat a bin Coastal y pa ultimo, Valero.
Pa Valero e gasoline stationnan aki no tabata mucho rentable y nan a entrega nan na diferente operador. Den e caso di esun di Boulevard (awo Citgo Boulevard), nan ta tine pa 16 aña caba, Acosta a reitera, kiermen na aña 2005 refineria a tuma over e gasoline station na Boulevard y Essoville.
Acosta a comenta cu debi cu Essoville ta situa net den e cruzada pa bay Baby Beach, e turistanan ta pasa cumpra sea gasoline of bay den e parti di tienda pa cumpra comestible of cualkier otro cos cu nan mester, y e ta un parti estrategico pa loke ta informacion pa e turistanan.
Humberto Acosta a señala cu na San Nicolas nan ta pone hopi enfasis riba e trato duna na e turistanan, y e hendenan ta hopi amable pa duna informacion.
Essoville tin un historia hopi bunita, y tin hopi cliente di añanan largo cu nan ta bin eynan. Turistanan di repeticion ora nan bay San Nicolas, nan ta keda bay na Essoville Gasoline Station.
Humberto Acosta a expresa cu nan tin e deseo di haci cambionan den e structura di Essoville, pasobra San Nicolas mester di un gasoline station grandi, renova, manera tin na Boulevard, Santa Cruz of Palm Beach cu ta hopi bunita y grandi. “Mi ta kere cu San Nicolas merece esey, pasobra nos sa cu e ta un structura bieu, traha na 1956, y aunke e ta wordo renova constantemente, ta yega un dia cu por bisa ‘ta basta’, pasobra e ta chikito pa e cantidad di clientenan cu e tin”
