E marcha pacifico aki no mester wordo mira como un manifestacion sino un expresion di apoyo pa e famia

ORANJESTAD (AAN) -- Diasabra atardi, e ciudadano Ramon Contreras, tata di e DJ hoben Luisangel Figueroa Flores,

ken dia 17 di October ultimo, a perde su bida despues di cay for di piso halto di Parkinglot di Paseo Herencia, a duna su punto di bida riba e caso aki.

Esaki durante un marcha pacifico organiza riba Plaza Turismo den Linear Park na Playa, den memoria di e hoben DJ, pa ken ta wordo pidi Husticia, manera a wordo expresa den varios borchi. Señor Contreras a expresa cu e marcha aki no mester wordo mira como un manifestacion, sino como un apoyo, mescos cu e autoridadnan di Aruba a duna apoyo na e famia cu kier un pronto solucion di e caso, un contesta haciendo enfasis den e caso di Luis Angel.

El a splica tambe e motibo pa cual a pidi e personanan den e marcha bisti na blanco, pasobra esaki ta simboliza e pureza y nobleza di e hoben, y manifesta cu e tabata un bon ciudadano. Contreras a gradici autoridad policial cu a otorga nan e permiso. El a reitera cu esaki ta un canamento pacifico, y nan kier mustra e autoridadnan di Aruba cu si nan ta kere den nan, pero cu nan tambe kier pa nan pone nan mes den e lugar di e famia.