ORANJESTAD (AAN): Diasabra atardi durante e ‘Marcha Pacifico’ cu a ser teni na Plaza Turismo, relaciona cu e 3 luna di fayecimento di e conocido DJ Louisville (den e caso cu a socede na e parkinglot di Paseo Herencia),
varios persona a mira cu esnan cu a participa, a tene borchi cu e palabra “impunidad” skirbi riba dje.
Kico realmente nifica ‘Impunidad”? E no ta aparece den ningun diccionario na Papiamento, pues e no ta un palabra cu ta wordo usa na Aruba. Y pesey cu razon tin algun hende cu no ta compronde kico e mensahe di impunidad nifica.
‘Impunidad’ ta un palabra na spaño, cu ora bo traduci esaki na hulandes e nifica ‘Straffeloosheid’. E palabra mes ta bin di latin, ‘impunitas’, cu kier bisa literalmente ‘sin castigo’.
Aki bo por compronde, cu e ta wordo usa ora cu husticia no a wordo cumpli, y e ta un circunstancia di no ricibi castigo pa un delito cometi, of riba cabez di un delincuente.
E ta wordo mira tambe cu e merecido castigo pa un acto no a wordo duna. Esaki ta bin pa ausencia di responsabilidad, y tambe ora cu ta nenga di duna e victima e derecho di haya husticia. Pues aki ‘impunidad’ ta pone na riesgo e proteccion di derechonan humano.
Rond mundo, ta ser bisa cu ‘impunidad’ por tin diferente causa, entre nan por menciona e.o. negligencia, falta di prueba, of tambe na algun pais tin soborno/intimidacion di autoridadnan. E ultimo aki por genera un situacion di pueblo ta sinti nan mes indefenso, y ta perde confianza den institucion y autoridadnan di Gobierno.
Pues den e caso aki, ‘impunidad’ na Papiamento tambe por wordo describi como ‘sin castigo’.
