“E idea no ta pa traha mas honing pero pone e abehanan den un situacion mas urbano”

Daniel Barros, director di Eco Living Aruba, tocante habitat di Santa Rosa:

ORANJESTAD (AAN) – Daniel Barros, director di e compania Eco Living Aruba, cu ta cooperando cu Santa Rosa pa setup un habitat nobo pa cria di abeha, den un entrevista cu Matutino DIARIO, a elabora tocante e tema aki.

El a comenta cu no ta tanto drecha, sino habri un tiki mas espacio, pa e abehanan y haci’e mas eficiente. “E idea no ta pa traha mas honing, pero pone nan den un situacion cu ta mas urbano. Aruba tin hopi cas y hopi condominium aworaki, pero nos tin cu wak con nos por traha cu abehanan cu nan no ta molestia hende y cu hende no ta molestia abehanan, anto na un manera hopi efectivo”, Barros a subraya.

El a agrega cu mester duna e ciudadanonan mas educacion, pero esaki ta un bon proyecto, pa hendenan bin akinan wak y siña den e situacion cu nos tin hopi cas pero bo kier pone cahanan di abeha, na un manera cu ta structura. No un manera ad hoc poni riba piedra of pabao di un dak, of algo similar, pero na un manera structura cu nos sa, mas of menos kico ta bay pasa.

“Nos no por controla full kico e abehanan ta bay haci, pero nos por pon’e den un condicion cu ta menos riesgo pa nan, anto ta menos riesgo pa hendenan”, Daniel Barros a subraya.

Barros a comenta tambe cu Aruba ta un isla turistico, y como tal tin hopi hende cu ta bin akinan pa su naturaleza, nan ta bay lama, pero nan kier siña hopi mas di locual nos tin na Aruba.

“Aruba tin un clima cu ta hopi special, si bo bay Jamaica, of Cuba, nan ta completamente diferente cu Aruba. Kiermen, ora nos bisa ‘esaki ta nos bee di Aruba’ e ora ey nan ta bira hopi mas interesa y nan ta bisa” ok, Aruba tin un specie di bij, special’ pasobra nan ta diferente cu otro abehanan”, el a señala.

Ta asina cu no por controla con hende ta core cu e bijnan pasobra nan ta sinti cu nan ta bay  pica, pasobra Aruba ainda no tin un ley pa proteha abeha.