ORANJESTAD (AAN): Durante e Accion di Bario na Mabon Complex,
habitantenan di e bario a habri porta pa duna Prome Minister Mike Eman un caluroso bonbini y comparti nan preocupacionnan diario.
E gobernante a topa cu varios habitante cu tin retonan serio cu salud pa cual ta bira imposibel pa mantene nan cas den bon condicion. Ta bon pa para keto y realisa e motibo pakico Gobierno tin cu asumi su responsabilidad.
Mientras ta pasa cas pa cas y recoge desperdicio, tambe ta combersa y busca manera pa brinda asistencia na esnan cu mas necesidad. Un di e habitantenan ta Sr. Albert Polonia cu ta anhela e tempo cu e mes por a yuda su mes y drecha su cas. Na e momento aki e ta sobrevivi cu su placa di pensioen. Pa hopi aña, Sr. Polonia a huma pero tambe a welder y kima koper, cual a pone cu su salud a keda afecta y 14 aña pasa a keda diagnostica cu malesa di pulmon yama COPD.
Enfermedad Pulmonar Obstructivo Cronico (COPD), ta e termino general pa un grupo di condicion pulmonar di largo duracion, principalmente emphysema y bronkitis cronico cu ta causa limitacion permanente di e fluho di aire y ta haci respiracion dificil. Sintomanan comun ta inclui falta di respiracion, tos cronico y resistencia minimo pa haci actividad diario.
E causa principal di (COPD) ta humamento, aunke exposicion pa tempo largo na contaminacion di aire, stof y bapornan kimico tambe por contribui na esaki. Aunke cu por preveni y trata COPD, unabes cu daña e pulmonnan, mayoria biaha esaki no ta reversibel. Cu deteccion tempran y cambio di estilo di bida por yuda disminui su progreso.
E peticion di Sr. Polonia na gobierno ta mas bien pa un instancia bin duna e y otronan den mesun situacion un man. Su peticion ta por brinda nan e asistencia pa limpiesa di e cas, pa asina nan por biba dignamente. Cu e situacion di salud aki, e no por haci absolutamente nada.
Na final di e bishita, Sr. Polonia a gradici Prome Minister Mike Eman pa e aumento di pensioen cual sigur a yud’e bon.
E ta keda positivo cu yudansa ta bay yega y ta spera cu un instancia por pone man na curason y brinda nan e asistencia basico na nan cas.
