Fundacion E Fortaleza y Sosten pa Famia cu suplica
ORANJESTAD (AAN): Manera cu DIARIO a publica caba, ta bay crea na Aruba un Rehab Center pa Empodera Hende Muhe. E ta un proyecto di Fundacion E Fortaleza y Sosten pa Famia. Ya caba nan tin 6 trailer na nan disposicion, cu mester wordo renoba y converti den Oficina, Training Center y un Cushina pa entrega cuminda na muchanan cu no tin cuminda merdia ora nan yega for di scol.
Gloria na Dios, Dios ta bon, y pesey awor nan ta buscando boluntario den tur sector di e isla, cual nan lo lesa e invitacion y manda nan email of WhatsApp pa asina por registra nan mes como boluntario.
Nan ta busca boluntario cu tin pasion y comprension pa yuda hende muhe cu a pasa den adiccion, maltrato of otro situacion dificil. Hunto por crea un ambiente sigur, amoroso, y di fe, unda e ser femenino por drecha su bida.
Pesey nan ta en busca di boluntario. Exigencia ta cu bo mester tin 21 aña of mas, por demostra comprension, pasenshi y respet pa limite personal, por domina Papiamento of Ingles (Spaño of Hulandes ta un ventaha). Por compromete su tempo regularmente (semanal of mensual).
Tambe ta busca esnan cu tin experiencia of interes den trabao social, cuido, sosten spiritual of comunidad. Ta conoci cu e concepto di trauma y dispuesto pa traha den un ambiente di fe y respet.
Fundacion E Fortaleza ta ofrece un experiencia boluntario cu tin impacto, tambe guia y training, un team di apoyo y sentido pa comunidad, y un oportunidad pa cambia bida di un hende muhe.
Nan ta extende e invitacion aki na tur esnan cu tin e curason y boluntad pa yuda otronan. Esnan cu tin curashi di saca un man, y despues di ricibi nan preparacion, por yuda den nos comunidad, y asina haci hopi famia contento. Nan deseo ta pa nos por haya entre 2 pa 5 voluntario den tur sector.
Bo por ta Polis, Douanero, Nurse, Waiter, Trahador den Prison, Security, Casino, Horeca en general, Airport, etc. Sea bon bini pa nos por forma un equipo victorioso.
Por yama of WhatsApp na 740-3237 of 661-9150, of via email:
This email address is being protected from spambots. You need JavaScript enabled to view it.
Di e forma ey por yuda e Rehab Center aki lanta y bira exitoso.
Demas personanan keto bay por haci donacion. Esaki por bay tanto online como cash. Nan cuenta di banco ta CMB Bank #65779308 cu Fundacion E Fortaleza y Sosten pa Famia.
