ORANJESTAD (AAN): Desde Februari 2021 tin dos studiante na DIMAS cu ta haciendo nan Tesis final di nan formacion di Bachelor na DIMAS.
Un di e studiantenan ta Julio Rincon di Universidad di Aruba. Tambe tin Emylane ‘Emy’ Geerman kende ta haciendo su estudio for di Haagse Hogeschool for di Hulanda.
Tur dos a bin haci un investigacion basta grandi pa asina termina nan estudionan, y pa asina nan por contribui tambe na nan pais, y tambe contribuyendo na e organizacion di DIMAS.
Marilyn Wout, Relacionista Publico di Departamento di DIMAS a splica cu e investigacion di Emylane ta riba e identidad di DIMAS pa asina wak si e strategia of e manera cu cual ta trahando ta locual e comunidad tin mester di dje.
E parti cu Julio ta bezig cu ne ta un encuesta di satisfaccion pa cliente cu tambe tin di haber pa bay di un 'red tape' pa un 'red carpet'.
Wout a pidi tur persona of cliente pa participa den e encuesta cu nan ta bezig cu ne.
El a agrega cu esaki ta e prome investigacion di e tipo aki cu ta wordo realisa. Tur aña DIMAS tin studiantenan cu ta haci nan tesis final of cu ta core stage y nan ta aporta cu nan raport.
El a agrega cu ambos studiante ta bay traha riba un raport cu ta bay trece recomendacionnan segun e estudio cu nan ta haciendo y cu nan ta culminando tambe.
Esaki ta bay duna DIMAS e hermentnan cu tin mester pa atende cu e kehonan cu ta wordo ricibi di clientenan y di comunidad. "Cu esaki nos ta bay un tiki mas deep y wak precis na unda y riba ki puntonan anto con e personanan ta desea pa nos mehora", a bisa.
Esaki ta un espacio pa comunidad bin cu ideanan y bisa kico nan kier wak na DIMAS, con y den ki termino nan kier wak'e, a agrega.
2020 a bin cu lesnan hopi grandi den e organisacion. A duna e momento pa por a reflexiona con ta operando como organisacion y con ta bayendo cu nan mes como coleganan.
E dos studiantenan aki a yega na un momento indica pa yuda DIMAS y haci mas investigacion pero tambe pa trece dilanti e strategianan pa por brinda un mihor servicio, e PR di DIMAS a expresa.
