ORANJESTAD (AAN) – Awe, Diaranzon 12 di Mei, ta wordo celebra e Dia Internacional di Enfermeria, manera ta sosode tur aña pa hopi decada.
Manera ta conoci, e fecha aki ta coincidi cu e fecha natal di Florence Nightingale, ken ta wordo considera como e fundador di Enfermeria moderno.
Hopi hende ta kere cu e docternan ta e profesionalnan mas importante den salud publico, pero esey no ta corecto. E personal di enfermeria semper ta desempeña un papel clave den tur institucion medico, como esnan responsible di e bienestar, seguridad y recuperacion di e pacientnan cu ta hospitaliza.
E enfermeranan semper a goza di un cantidad enorme di conocemento y habilidadnan diverso, y atravez di specializacionnan awendia nan ta practicamente indispensable, pa yuda trata diferente malesa, por ehemplo cancer, diabetes, entre otro. Ademas nan ta hunga un papel hopi importante den e salanan di operacion y tambe yudando e mamanan cu ta haya yiu despues di e parto, y segun e caso tambe durante e parto.
E personal di enfermeria ta traha den un ambiente di stress cu por bira extremo, ora cu nan ta funciona cu yen di limitacion pa falta di material of otro tipo di recursonan. Den exterior ta hopi ehemplo por wak ora cu den noticianan di hospitalnan hopi mal dota of den colapse door di Covid-19, ta mustra esaki.
Na Aruba tambe tin un personal di enfermeria cu ta traha hopi duro, y for di momento cu e Covid-19 a toca e porta di nos pais, te ainda, nan no a para di traha mas duro cu normal, cu ya caba ta un trabao pisa. E gran mayoria di nan ta haci nan trabao cu profesionalismo, cu hopi amor pa e pacient, y dunando tur di nan mes pa bienestar di e personanan cu ta bao nan cuido.
No por imagina un docter specialista, por ehemplo, cu por traha sin un verpleegster of un enfermero, hunto cune.
Pesey, DIARIO ta dedica e articulo cortico aki, pero di henter nos curazon na tur Verpleegster y enfermero na Aruba y na Mundo; nan tambe durante e pandemia aki ta fungi cu e angelnan di prome linea. Dios bendiciona boso tur!
