E grado di vacunacion ta mustra un mehoracion e ultimo dos lunanan

ORANJESTAD (AAN) -- Minister di Salud,  Dangui Oduber,  a mustra satisfecho tambe,  y asina el a bisa den conferencia di prensa (update Covid-19), pasobra e grado di vacunacion ta indica un mehoracion e ultimo dos lunanan.

            E cifranan cu tin actualmente ta di personanan entre 18 cu 59 aña di edad; 77% di esnan riba 18 aña ta cu 59, a haya un dosis di e vacuna, 71 % tin dos dosis caba, y esnan riba 60 aña cu ta e grupo di riesgo (vulnerable), 79% tin un dosis y 76% tin dos dosis, y esaki sigur ta sumamente importante pa e proteccion cu gobierno kier ofrece na nos comunidad.

            “Nos a bisa semper, desde cu e vacuna a bira conoci, nos a haci nos maximo esfuerzo pa percura pa nos tin suficiente vacuna, pa por brinda na nos comunidad. Nos ta satisfecho con comunidad a responde na e yamada ey, y nos ta keda recomenda y stimula tur esnan cu pa un motivo of otro ainda no a  tuma nan vacuna.

            DVG continuamente, di Dialuna pa Diabierna, ta ofrece oportunidad pa muchanan riba 12 aña bay ariba, tuma nan vacuna. Kiermen, nos como gobierno; sigur como Crisis Team, y ami como minister di salud ta keda recomenda tur hende tuma e vacuna, pasobra nos ta mira e resultado den e cifranan di e cantidad di personanan cu ta wordo hospitaliza; e personanan cu ta fayece cu riba 80% di nan no a tuma nan vacuna”, e dignatario a señala.