E edificio actual di Aduana no ta loke e trahadonan merece

Edward Maduro, Presidente:

ORANJESTAD (AAN):  Recientemente, despues di e mudamento di Departamento di Aduana na nan localidad nobo, a surgi cierto reaccion di e trahadornan relaciona cu e caminda pa yega na e edificio.

            Edward Maduro, Presidente di Sindicato SADA a duna di conoce cu locual ta pasando ta un otro mustra di e incapacidad di e director. El a bisa cu ora cu e director a forma un comision pa bay busca un edificio temporal, e sindicato a wordo laga afo di e comision aki.

            E ta indica tambe cu cualkier hende cu wak e caminda aki di santo ta un caminda cu cada biaha ta daña unabes cu awa cay.

            Den nan opinion nan ta haya esaki lamentabel pasobra e edificio tin hende cu ta di acuerdo cu ne, pasobra e ta miho cu e anterior, pero no ta locual Aduana merece, Maduro a expresa.

            Maduro a enfatisa cu nan no ta critica DOW, pero cu si tabatin otro alternativanan cu lo por a sondea prome cu a scoge un 'warehouse' pa convirtie den un oficina pa Aduana.

            Aduana ta haya tur aña casi 300 miyon florin y por a inverti 8 miyon den un edificio nobo y hunto cu tur e mobiliario nobo e lo yega rond di 10 miyon florin, a indica. Tur esaki ta pone cu e empleadonan ta demotiva mas, a agrega.

            E ta lamenta tambe cu e director a haya e 'walk-out' di e trahadonan como algo innecesario. Pero esaki ta un indicacion di ken e director ta.