Presidente di Parlamento Gerlien Croes a indica:
ORANJESTAD (AAN): Presidente di Parlamento di Aruba, Gerlien Croes, a manda un carta na Gobierno di Aruba dia 3 di februari 2025, cu un copia na Colegio di Supervision Financiero (CAft), pa recorda cu e Nota di Contestacion ((Nota naar aanleiding van het Verslag) riba e presupuesto 2025 ainda no a wordo ricibi na Parlamento.
E documento aki ta hopi importante, pasobra sin dje, e proceso di tratamento di ley di presupuesto no por inicia. E Nota di Contestacion ta un respuesta oficial di Gobierno unda nan ta duna claridad y motivacion tocante e contenido di presupuesto. Esaki ta esencial pa Parlamento por evalua y debate e propuesta prome cu e por wordo aproba.
E atraso den entrega di e documento por afecta e planificacion financiero y e ehecucion di presupuesto, cu eventualmente por tin consecuencia pa e funcionamento di gobierno y e provision di servicio den pais.
