Voznan a lanta pa berdad bira base atrobe di Status Aparte
*AVP a aproba kiebra di firma di 2147 Arubiano di 18 di Maart 1948
*Aruba a bira Teritorio Insular di pais Antillas Hulandes den Reino
ORANJESTAD(AAN)—Despues di publicacionnan continuo di DIARIO pa defende e berdad historico di Aruba, peticionnan ta sigui drenta pa sigui contra aresta mentiranan cu politiconan ta presenta na Pueblo di Aruba.
Mientras ya Februari ta avanza, Aruba ta prepara pa celebracion di su Dia Nacional cu ta 18 di Maart, cu a wordo introduci pa Betico Croes, cu den su lucha pa autonomia real di Aruba, a percura pa un dia nacional di Aruba mes, mescos cu el a percura pa Himno, Bandera, moneda y Papiamento di Aruba.
E grandeza politico di Betico Croes a haci cu e no a mira su probecha politico ni probecho futuro di su partido, pero a tene su mes na historia di e Pueblo Arubano, cu semper tabata desea di ta un Pueblo autonomo den Reino Hulandes, pa asina e Arubiano por a defende e interes di Pueblo Arubano pa medio di gobernacion propio.
Den e cuadro aki na 1947, Henny Eman a organisa un accion di firma di Arubianonan pa yega na documentacion oficial di e deseo di Separacion di Aruba for di Antillas Hulandes.
El a logra acumula 2147 firma como sosten oficial di Pueblo di Aruba na e lucha di Separacion.
Na 1948 e yiu di Henny Eman, Shon A Eman, a representa Aruba na e prome Conferencia di Mesa Rondo. Dia 18 di Maart 1948 el a entrega e firmanan na Gobierno di Reino Hulandes como prueba di e deseo di Pueblo di Aruba pa resorta directamente bou Hulanda den e sistema legal di Reino prome cu cambionan estatal a wordo introduci pa e islanan Hulandes den region di Caribe.
E Staatsregeling (Areglo di Estado) di 1948 a wordo sigui pa e prome “Interim regeling” (areglo temporal) di 28 di September 1950, cu a entrega na Antia Hulandes e responsabilidad propio di Legislacion y Gobernacion.
E prome areglo legal cu a mira luz a bira e Eilandenregeling conoci popularmente pa su abreviacion ERNA, cu a reglo e posicion di e islanan na 1951.
Asina Eilandsraad (Conseho Insular) a haci su entrada, cu a ricibi mando di su asuntonan domestico.
Aki sigur mester acentua e palabranan “asuntonan domestico” pues di cada isla cu por a regla su asunto interno manera construccion di caretera, construccion di cas popular, manera un version basa riba un “gemeente” Hulandes pero cu mucho mas autoridad, tabata representa.
Na 1954 Statuut a drenta na vigor, pero prome cu por sigui pa Statuut na 1954, mester atende cu e Interim Regeling di 1950 cu a entrega e islanan un caminata pa un futuro nobo pero a bira e momento cu politiconan Arubano, mester a entrega e formula di 8-8 den Parlamento di Antilla y acepta e formula di 12-8, cu a entrega Curacao e mayoria di voto den Parlamento Antillas, caminda e reparticion a bira 12 asiento pa Curacao, 8 pa Aruba, 1 pa Bonaire y 1 pa Isla Aruba, pa yega na un total di 22.
Esaki tabata e momento pues cu e lucha original di Aruba pa Separacion di Antillas Hulandes a bira un relacion nobo pa medio di e Parlamento di Antillas Hulandes, den cual Aruba a haya un minoria.
Pues AVP a bay di acuerdo cu un gobernacion central di e islanan den e pais Antillas Hulandes, den cual separacion manera entrega cu peticion di firma di 2147 Arubiano na 1948, a wordo kibra.
Hasta e forza di Aruba cu un posicion di 8-8 enfrente Curacao a wordo likida na momento cu AVP a bay di acuerdo cu e reparticion di 12 asiento pa Curacao y 8 asiento pa Aruba, den Parlamento di Antia Hulandes.
Esaki a bira final di e lucha pa Aruba bira un pais den Reino, te na e momento cu Betico Croes a introduci e lucha pa Status Aparte, cu a realmente transforma Aruba den un pais autonomo den Reino Hulandes dia Prome di Januari 1986.
Realidad historico di Aruba ta keda, cu AVP no por uza 18 di Maart como un dia cu ta papia di lucha honesto di AVP pa Pueblo di Aruba, pa e simpel motibo cu AVP a kibra e deseo original di Pueblo di Aruba pa Separacion di Aruba for di Curacao y na 1950 hasta a bay di acuerdo pa deshaci di e posicion igual di Aruba vs. Curacao den Parlamento di Antillas Hulandes, loke a kibra e momento dia 18 di Maart cu Shon A Eman a entrega e peticion di Arubianonan na Conferencia di Mesa Rondo pa un “Separate Status” pa Aruba. Asina AVP mes a kibra e lucha cu AVP mes a inicia!
Betico Croes a introduci y a coy e bandera di Aruba pa realiza Status Aparte di Aruba.
