E Economista Rendell de Kort ta kere den e potencial di e proyecto Floating Farm

E ta haye super importante pa Aruba

ORANJESTAD (AAN) E Economista Rendell de Kort, den entrevista cu DIARIO a comparti su opinion tocante e proyecto Floating Farm, y si algo similar por wordo adapta pa funciona na Aruba.

El a bisa cu esaki ta un proyecto innovativo y e ta haye super importante pa Aruba como un bon alternativa unda ta purbando pa crece e sector primario.  El a menciona cu e proyecto di Hydroponics, por ehemplo, ta resulta hopi exitoso pero e pregunta ta “Kico mas nos por haci”.

“Anto, no necesariamente nos mester yega y ‘copy paste’ algo di afo y pone traha akinan, pero nos mester cuminza cu e discusion si, di kico por traha y, eigenlijk, papia hunto cu e stakeholders riba opcionnan”, e economista Rendell de Kort a señala.

El a comenta cu durante e podium tocante “food security” pa Aruba, a sali basta recomendacion kico ta bon pa promove seguridad di alimentacion. Un di e puntonan tabata pa bin cu proyectonan piloto innovativo.

El a bisa cu den e sentido ey Floating Farm ta un ehemplo pa pensa riba proyectonan innovativo cu lo por introduci, pero e ta un proyecto cu na Hulanda ta funciona; nan tin baca pero na Aruba no por papia di esey, sino cu aworaki aki ta pa habri e oportunidad pa trece esnan cu duna input, y discuti kico si por traha. Kizas nos por pone cabrito y cu esey por bisa algo.

“Esaki ta un proyecto cu mi ta kere tin su potencial. Nos tin un mercado grandi di turismo tambe, y kizas ta interesante for di e perspectiva ey pa tin algo innovativo tambe, caminda hendenan sa cu tin un historia su tras, mas leu cu djis cumpra den e supermercado, pero cu su produccion ta tuma lugar local, e ta algo cu ta duna resiliencia pasobra si algo pasa e ta duna nos chens tambe pa ta mas autosuficiente”, Rendell de Kort a indica.

El a agrega cu e ta conciente cu tin cosnan cu mester cana pa wordo realiza, regla e vergunningnan, por ehemplo, si establece akinan mester pensa riba e “business model” con precies e ta bay funciona, si pone baca of pone cabrito, pues tin cu wak con esey a bay desaroya, ki e mercado ta; y si enberdad tin hopi trabao pan nos yega asina leu.