Libertad di un patria ta depende di un economia fuerte y independiente
*Celebracion Aña di Turismo a entrega mundo e producto Aruba
*Planta nobo pa awa y electricidad den un economia diverisifica
ORANJESTAD (AAN): Ora papia di un Status Aparte di Aruba, no ta papia di un pais cu solamente riba tereno estatal, a separa su mes for di Antia Hulandes pa keda un pais den seno di Reino Hulandes.
E concepto di Status Aparte cu Betico Croes a entrega na Aruba, tabata basa riba nacemento di un pais nobo, cu por a brinda Pueblo di Aruba e felicidad cu mester toca tur ciudadano di un pais na nan pais.
Den e concepto cu Betico Croes a entrega, no por papia di un Aruba como isla cu ta cay directamente bou Hulanda y no ta mara mas na Union Antiano.
Betico Croes a diseña un pais, cu ta honra e concepto di pais enfrente su ciudadanonan cu a ricibi e base di un bida digno di un ciudadano como ser humano, riba tur tereno.
E existencia feliz di un ser humano den un sistema democratico, ta depende directamente riba un bon calidad di bida pa e ciudadano na un pais liber, cu no ta mara na e peso di dependencia di otro pais, ya cu dependencia na otro pais automaticamente ta encera cu e otro pais por uza forza contra bienestar di e ciudadanonan di e pais en cuestion.
Loke Betico Croes a presenta na Reino, a bay mas leu cu cambio di poder na Aruba den e sentido cu e lucha sagrado di Status Aparte tabata mara directamente na e dignidad di e Arubiano como hende, cu por conta cu tur e ingredientenan necesario pa e por desaroya su talentonan natural na interes di su propio persona y di e pais.
Ora papia di Status Aparte, ta papia di accion di e movemento politico cu Betico Croes a introduci, cu directamente a cuminsa traha riba tur loke ta necesario pa felicidad di e Arubano cu ta cuminsa cu e necesidad pa e pan di cada dia, posibilidad pa crecemento personal y reconocemento directo di e balor di un ciudadano como ser humano den e sentido mas amplio di e palabra.
Economia di Aruba sigur ta bini dilanti den e trabou cu a wordo eherce dor di e gobiernonan di cual Betico Croes tabata consehero, mientras e tabata dirigi e lucha paStatus Aparte.
E posibilidad grandi di Aruba pa diversifica economia cu tabata basa riba Lago na prome lugar, a wordo enfatisa den e forma cu na añanan 80, Aruba a presenta su mes na mundo den e gala di Aña di Turismo, cu a expone na mundo e loke turismo di Aruba tabata ofrece.
Mientras Betico Croes tabata dirigi e parti culminante legal di Status Aparte, economia di Aruba pa medio di turismo a habri portanan di e isla pa e mundo internacional di turismo y di publicidad, cu a expone Aruba como e paraiso turistico.
Mientras proyectonan turistico a cuminsa presenta nan mes na Aruba, e sector di turismo a sigui amplia su mes cu e diferente servicionan di excelencia cu Aruba tabata ofrece e turista, cu a duna contenido na e diversificacion turistico y creacion di un ala nobo pa economia, cu tabata depende di Lago den un mundo den gara di problemanan internacional basa riba petroleo.
Celebracion di Aña di Turismo tabata uno di e logronan grandi di Aruba na caminda pa su Status Aparte, cu tabata demanda un economia fuerte pa asina sigura e bienestar di e Arubano directamente.
Como pais turistico, Aruba tabata tin necesidad di bon infrastructura. E planta di coriente y awa sigur tabata den necesidad di cambio grandi.
Ora coriente a cuminsa “trip”y amenaza e comfort turistico cu un Aruba cu mester a cumpra awa, e problema a wordo atende y a percura pa un planta di awa y coriente cu por a sostene e economia creciente di Aruba.
Na 1983 na culminacion di e Conferencia di Mesa Redonda, Betico Croes, sin sosten di otro partidonan di Aruba cu no ta MEP pero cu sosten absoluto di Aruba, a percura presenta Reino un Aruba basa riba Status Aparte, como base di un estado di derecho cu ta garantisa bienestar di e Arubiano y ta exigi bon gobernacion.
Esaki a haci cu Aruba por a sigui cana ora Lago a cera su porta y Betico Croes a bira victima di ladronicia di un lucha cu el a hiba te 1985, ora mientras Aruba tabata celebra victoria di Betico Croes, e heroe mes mester a bandona e pais cu el a diseña y realiza, pero cu nunca e mes lo a mira pasobra Status Aparte ta marca tambe e aña final di su bida y porta pa otro goza di su trabou!
