Autor Lady Ruthy a batiza y lanza su prome buki na Papiamento pa Mucha “Rene su dushi wega”

Durante un bunita presentacion na UNOCA:

ORANJESTAD (AAN)  E autor Ruthy Vrieswijk- Bergen, mas conoci como Lady Ruth, e poëta di pueblo, recientemente, durante un bunita presentacion cu a tuma lugar na UNOCA, a batiza y lanza su prome buki pa mucha  skirbi na Papiamento, titula “Rene su dushi wega”.

Den entrevista cu DIARIO, el a conta cu esaki ta un storia cu a sosode den e añanan 80, tempo cu su yiunan tabata chikito y su type mashin tabata anticua.

“Anto, aña pasa mi a coba den mi papelnan, den mi cas na Dakota, y mi a bin topa cu e papel y mi di cu e por bira un storia. Mi a acerca UNOCA, nan a bira hopi entusiasma. Olivia Figaroa, den feliz memoria, a sostene e proyecto aki for di cuminzamento”, Ruthy a duna di conoce, agregando cu e ex director di UNOCA y henter e directiva a kere den dje a haya cu Ruthy a bin cu algo bon na Papiamento y asina el a desaroya su proyecto cu el a presente den un anochi hopi anima. Madrina di e bautismo di e buki ta Anna Diaz y Padrino ta Ike Posner. E guitarista Jerry Dias a toca y nan a canta algun cantica pa mucha.