E di dos edicion di "Expo Health 2024" lo tuma lugar dia 29 di september

Dr. Jenny Montiel:

*Enfoca riba bienestar di e poblacion y prevencion 

ORANJESTAD (AAN):   Diadomingo 29 di September ta bay tuma lugar na Hyatt Place e di dos edicion di 'Expo Health 2024 (The path to Wellness & Vitality)".

            Den entrevista cu Dr. Jenny Montiel-Camacho, un di e organisadornan di e evento, el a splica cu e ta un 'naturopata' specialisa den terapia di sanacion. Tur cos natural. Actualmente e ta bezig organisando un expo di salud den su di dos edicion.

            El a remarca cu e obhetivo di e expo aki ta e bienestar di e pashent enfocando riba e parti di prevencion. "Aruba ta un isla chikito y si nos tur ta organisa y bini hunto den e parti di salud, nos por haci di Aruba un isla cu hende mas saludabel, disminuyendo e riesgonan di obesidad, presion halto, trombosis, diabetes".

            E meta ta pa disminui e presencia di e malesanan aki na Aruba. Actualmente tin un porcentahe halto di diabetes y hende obeso. Y no solamente ta afectando e adultonan, pero tambe mucha y hoben. Ta increibel pa haya sa cu tin mucha cu malesanan di hende adulto, a remarca.

            Pa e motibo aki un grupo di profesionalnan a bini hunto pa trece dilanti un tremendo proyecto pa e comunidad por ta mas saludabel. Scoge pa bay riba e caminda di salud .

            Ta reitera cu e expo lo tuma lugar diadomingo 29 di september na Hyatt Place Aruba di 10:00 a.m. te cu 5:00 p.m. (5:00 p.m. - 6:00 p.m lo tin e ora fit).

            Durante di e dia aki, e publico presente lo por disfruta di un serie di actividadnan diseña pa mehora bo salud y bienestar, incluyendo actividadnan manera: chekeo di salud, presion, BMI, vet corporal, test di bista, seminario & tips, yoga, pilates, hiit cardio, kangoo jumps, y zumba fitness como tambe exhibicion di producto y servicionan dedica na e bienestar.

            Mester remarca cu esaki lo bira un espacio pa comparti conocemento y informacion. Lo ta un dia yen di oportunidadnan pa nutri bo curpa, mente y spirito. E entrada na e expo ta completamente gratis, Dr. Jenny Montiel a duna di conoce.