Prins Bernhard Cultuurfonds Caribisch Gebied a cambia di nomber
ORANJESTAD (AAN): Siman ta cuminza cu e informacion cu entrante awe Prins Bernhard Cultuurfonds Caribisch Gebied ta continua bao di un nomber nobo: het Cultuurfonds Caribisch Gebied.
E cambio di nomber ta resultado di nos evolucion y nos bista riba futuro. E nomber nobo ta refleha miho ken nan ta awor y unda nan kier yega.
Aparte di e tempo cu nan a tuma internamente pa refleha y celebra e di 70-aniversario, e decision aki a haya e atencion y dedicacion necesario. Nan no a mira solamente e mision pa futuro, pero a para keto tambe na origen di e fondo.
Dia 7 di augustus 1953 Prins Bernhard a firma e acta di fundacion di e fondo na Curaçao.
Cu esaki el a debolbe e fondo na su tera natal Caribeño. Durante segundo guera mundial e pueblonan di Caribe Hulandes a colecta placa cu a contribui en grande na e Spitfire Fund, destina pa compra di material di guera pa yuda Hulanda. Despues di guera, e placa cu a sobra a sirbi como base pa comienso di un historia bunita di sosten continuo pa arte y cultura, tanto na Hulanda como na Caribe Hulandes.
Het Cultuurfonds Caribisch Gebied ta dedica su mes na desaroyo di cultura y preservacion di e identidad unico di Aruba, Bonaire, Curaçao, St. Maarten, St. Eustatius y Saba. Nan ta duna sosten na iniciativanan cu ta pone e cultura y naturalesa Caribeño den centro di atencion, tanto localmente como mundialmente. Nos logo nobo, cu su solo radiante den su centro, ta simbolisa e conexion entre nos islanan y e spirito bibo y calor di e area Caribense.
Awor cu nan ta cera e aña di aniversario, nan ta hopi orguyoso pa revela e nomber y logo nobo. Cu boso sosten continuo, nan ta sigui compromete na promocion di e rikesa cultural enorme y e bunitesa natural di e islanan.
