Rhomyko Winklaar, director:
*Salud mental ta un di e temanan cu mas a crece ultimo añanan
ORANJESTAD (AAN) – Director di Fundacion Anti Droga Aruba (FADA), Rhomyko Winklaar, tambe a participa den e conferencia di prensa relaciona cu e evento “Gold Mine Run & Walk” cu lo tuma lugar dia 20 di October proximo, en conexion cu observacion di Dia Mundial di Salud Mental, cu ta dia 10 di October.
Rhomyko Winklaar a bisa cu enberdad FADA ta apoya e iniciativanan aki, grandemente, pa trece concientizacion pa loke ta trata salud mental.
Winklaar a expresa cu, manera ta conoci, salud mental ta un di e temanan cu a crece na Aruba durante e ultimo añanan, vooral despues di pandemia.
“Nos como organizacion ta apoya, naturalmente, locual ta trata e GGZ instellingen, pa e bunita trabao cu ta wordo eherce den esaki. Manera a menciona, e aña aki ta tuma lugar e di cinco edicion di ‘Gold Mine Run & Walk’. Pa participa den esaki ta hopi facil y esaki ta pa tur edad: for di esun mas chikito te esun di mas grandi na cas, por ehemplo. Esaki no ta un obstaculo pa forma parti di e evento.
Por inscribi via e diferente stakeholders nan facebook page: Stichting Hunto, FADA, Respaldo, Healthy Lifestyle y Patrishi Sports, cu ta esnan encarga cu e parti di logistica di e evento”, Winklaar a menciona.
Tur esaki lo hiba boso na e website www.goldminerun.com. Pago por wordo haci online. Winklaar ta encurasha tur hende pa bin cana hunto y un y tur ta bon bini.
