Aruba y mundo mester atende problemanan cu tabata pega den lachi --- *Un murcielago a transporta un peliger ignora cu a habri wowo --- *Porfin mester baha gasto, regresa na normalidad y mucho mas
ORANJESTAD (AAN) — Ta cu cierto curiosidad, cu ta tipifica hende, nos a tuma e decision pa analisa e punto central di tur loke ta pasa na mundo.
Nos curiosidad no ta nada nobo ya cu e prome hendenan Adam y Eva, pa motibo di curiosidad a hinca humanidad den problema y a pone hende bandona paraiso loke ta haci cu awor nos ta na careda pa un situacion cu nunca hende a pensa cu e lo enfrenta.
Sabiduria di hende a hiba mundo na e momento culminante, cu hende a cana riba luna y hende a cuminsa prepara su mes pa cualkier atake di extraterestre cu por a invadi mundo.
Hende a alcansa un sabiduria enorme, cu sumanan enorme a wordo inverti den tur tipo di arma pa defende mundo contra UFO, e obhetonan nunca identifica cu lo mester a transporta habitantenan di otro planeta pa mundo.
Mientrastanto cantidad di asunto serio a keda pega den lachinan y a bira herencia di gobiernonan cu a sigui otro.
Hende a sobresali den e forma cu el a logra sconde problema.
Si avestruz ta dera su cabez den santo, hende tin e capacidad di no mira loke e mester mira pa asina atende loke por spera, pero por wordo uza tambe pa nunca atende prioridad.
Na 2020 mundo a drenta den un shock.
Un murcielago, segun ta wordo asumi te awor, a percura pa un virus, cu tabata tin un pariente na inicio di siglo 21, cu a haya e nomber di Coronavirus Uno.
Na 2020, e Coronavirus nobo a ataca.
Un virus a pone hende lomba contra muraya pasobra mescos cu tur virus e ta invisibel y enemigo di hende.
E virus aki a keda invisibel pasobra hende mes no kier a kere cu tin algo cu por domina hende ainda. Pues mundo a celebra Carnaval, a baila mientras ya e virus tabata mata.
Portanan di mundo a cera. Economia mundial a basha abou.
Mundo a haya su den den un careda pa busca solucion pa e virus pero na prome luga pa su mes.
Ora analisa loke a pasa na Aruba, cu ta e teritorio cu directamente nos mester cubri den e rubrica aki, por mira con e virus a exigi Aruba pa atende problemanan cu e pais pa hopi tempo a lubida cu e mester a atende.
Si ya pa un decada Reino a bisa Aruba cu mester papia di estado di bancarota y hasta Statuut a hoga den e olanan financiero cu a bati costa politico for di 2014 ora Hulanda a yega, tabata e coronavirus cu a haci tur hende comprende berdad.
“Tot hier en niet verder.” Te aki y no mas leu, ta e palabranan cu Hulanda a haya oportunidad di expresa ora el a firma e acuerdo pa Aruba haya asistencia pero porfin atende cu su problemanan.
Awe tur hende ta ki acuerdo cu mester yega na solucion.
Mas y mas hende ta cuminsa cu tempo di paranda politico sin placa, ta asunto di pasado.
Awe porfin hende ta cuminsa comprende cu e brug cu mester construi ta e brug financiero y economico pa futuro.
Den un situacion sumamente dificil, Aruba ta lucha contra e Coronavirus, cu ta cambia di disfraz. Pero porfin Aruba ta lucha den realidad.
2022 kier haci su entrada den un situacion sumamente dificil. Un situacion cu for di 2020 a presenta y a haci Aruba y henter mundo realisa, cu asina no por sigui.
Cu hende mester stop di mira UFO y atende tur loke a keda pega den lachi di politiconan, cu a pone hende baila pa awe nan paga pa e gastonan di baile.
