E di 39 inauguracion di decoracion di e Cas di Luz na Sero Preto a tuma lugar Diasabra

ORANJESTAD (AAN) – Dia 30 di November ultimo, a keda inaugura, pa di 39 aña sigui, e famoso y tradicional decoracion di e cas di luz di Sero Preto, na San Nicolas.

            Tabata tin diferente sponsor, cu a colabora cu nan donacion, y a conta cu e colaboracion di señor Anthony Irausquin, director di NV Elmar. E compania ta sponsor e uso di coriente pa e aña aki. E organisadonan di e evento aki a expresa palabranan di gratitud pa tur cu a colabora y haci tradicion aki posible, ya pa 39 aña. 39 aña no ta facil, hopi biaha no tabata tin e manera pa cuminsa, pero Dios ta duna e miembronan di e organizacion e forza, pasenshi y creatividad pa aña nan tin un tema nobo pa ofrece Aruba, y nan ta spera cu e aña aki atrobe ta un deleite pa e pueblo bishitante.

            Señora Vanessa Croes, Sinto Kock, y Anthony Irausquin (director di NV Elmar) a haya e honor di a cende e luz. Orario pa bishita e cas di luz ta di Diahuebs pa Diadomingo ta anochi di 6.30’or pa 11’or. Diabierna pa Diasabra di 6.30 pm pa 12’or. Esaki cu excepcion di dia 5 y 6 di December awo cu e cas ta completamente cera, relaciona cu dia di eleccion parlamentario.

            Tabata tin animacion musical di Banda La Paranda, y un cushina bon surti.