ORANJESTAD (AAN): Graduado Joselynne Croes di Universidad di Aruba kende a studia Ley,
a gana e asina yama “Best Thesis Award” na Universidad pa su scriptie “Compulsory vaccination and the law: Can these two go hand in hand on Aruba? A research into the possibility of introducing compulsory vaccination on Aruba”.
Joselynne semper tabata tin hopi interes den vacuna y pa e motibo aki a dicidi di dedica su scriptie na esaki.
Durante e proceso pa skirbi su scriptie, Joselynne a acerca afdeling Jeugdgezondheidszorg (JGZ) di DVG y a tene entrevistanan cu hurista Ebrina Curet y tambe cu dokter Janice Essers-Hooft, kende ta alaves docter na Wit Gele Kruis. Esaki tabata pa e por a haya mas informacion tocante e programa di vacuna di muchanan na Aruba.
DVG ta sumamente orguyoso cu Joselynne a gana e premio di “Best Thesis” di facultad di Ley y ta desea Joselynne hopi exito den su futuro carera.
