Parlamentario Ricky Hoek riba dia internacional di Derecho di Persona cu Limitacion:
ORANJESTAD (AAN): “Awe nos ta uni cu mundo pa conmemora Dia Internacional di Derecho di Persona cu Limitacion. E fecha aki ta sirbi pa reflexiona riba e esfuerzonan cu mester sigui haci pa garantisa cu tur hende, sin exclui persona cu limitacion, por gosa di un bida digno y igualitario”, Parlamentario Ricky Hoek di Fraccion di MEP a declara.
Aruba tin un paso importante pa tuma den e lucha pa bienestar di e personanan cu limitacion, esta, e ratificacion di un tratado internacional cu ta busca proteha nan derecho. Sinembargo, Aruba no por a hacie ainda, pasobra tin cierto condicionnan cu nos pais mester cumpli prome, sino nos lo expone nos mes na boetnan. Esey no ta kita for di nos compromiso pa traha di manera constante y determina pa atende e necesidadnan di e grupo aki. Aruba ta haci su best pa e grupo aki y ta spera cu den futuro cercano por firma e tratado aki.
“Personanan cu limitacion ta mi grupo meta, Ricky Hoek a remarca. Nos ta un comunidad cu compromiso colectivo pa traha pa bienestar di e personanan aki. Desde 2007, e plataforma di persona cu limitacion a sirbi como un ekipo pa uni fundacionnan y entidadnan, pa mehora bida di e persona cu limitacion. Esaki ta un ehempel cla di loke por logra ora nos traha hunto”.
Como Parlamentario, mi compromiso ta keda cla y sigui consistente. Na maart di 2022, mi a pasa un mocion pa mehora parkeerplaats pa personanan cu discapacidad, cu Parlamento di Aruba a aproba unanimamente.
Awor Gobierno tin e responsabilidad pa stipula e maneho y regula ley pa implementa esaki, inclui sancionnan cu ta mara na su uzo. Esaki ta un paso chikito pero significativo pa asisti e personanan cu limitacion.
Un otro tema importante ta scol pa muchanan special. Mi ta sigui boga pa por tin scolnan cu instalacionnan adecuado y personal capacita pa atende e necesidadnan unico di e muchanan special. Nos muchanan mester tin e hermentnan necesario pa logra nan potencial maximo.
E personanan cu limitacion mester ta un prioridad na tur nivel. Awor mas cu nunca, nos ta responsabel pa traha na crea un sociedad inclusivo y husto. Ta un honor pa sigui representa y defende e interesnan di mi grupo meta”, Parlamentario Ricky Hoek a expresa.
